Շառլ Միշելը շնորհավորել է Դոնալդ Թրամփին ընտրություններում հաղթանակի առթիվ

ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: Եվրոպական խորհրդի նախագահ Շառլ Միշելը շնորհավորել է Դոնալդ Թրամփին ԱՄՆ ընտրություններում տարած հաղթանակի առթիվ՝ հայտարարելով, որ ԵՄ-ն կհետևի իր ուղեգծին։ «Արմենպրես»-ի փոխանցմամբ՝ այդ մասին նա գրել է X սոցիալական հարթակում:

«Շնորհավորանքներ ընտրված նախագահ Դոնալդ Թրամփին: ԵՄ-ն և ԱՄՆ-ն ունեն ամուր դաշինք և պատմական կապ: Որպես դաշնակիցներ և բարեկամներ՝ ԵՄ-ն ակնկալում է մեր կառուցողական համագործակցության շարունակությունը: ԵՄ-ն կհետևի իր ուղեգծին՝ համաձայն իր ռազմավարական օրակարգի՝ որպես ուժեղ, միասնական, մրցունակ և ինքնիշխան գործընկեր՝ պաշտպանելով կանոնների վրա հիմնված բազմակողմ համակարգը», - գրել է նա:

ԱՄՆ նախկին նախագահ Դոնալդ Թրամփը հայտարարել է ընտրություններում իր հաղթանակի մասին այն բանից հետո, երբ Fox News-ը կանխատեսել է, որ նա հաղթել է ԱՄՆ փոխնախագահ, դեմոկրատական թեկնածու Քամալա Հարիսին։ Ըստ Fox News-ի՝ Թրամփն ապահովել է ընտրիչների 277 ձայն՝ անհրաժեշտ 270-ից։ Ըստ այլ լրատվամիջոցների տվյալների՝ Թրամփն ապահովել է ընտրիչների 267 ձայն, Հարիսը՝ 224։   

Թրամփն ընտրվելու կապակցությամբ արդեն շնորհավորանքներ է ստացել աշխարհի մի շարք երկրների, այդ թվում՝ Ֆրանսիայի, Հունգարիայի, Մեծ Բրիտանիայի, Իսրայելի, Հնդկաստանի ղեկավարներից, ՆԱՏՕ-ի գլխավոր քարտուղարից։   

Դոնալդ Թրամփին «տպավորիչ հաղթանակի» առթիվ շնորհավորել է նաև ՀՀ վարչապետ Նիկոլ Փաշինյանը։