«Խաղաղության խաչմերուկ» նախագծի իրականացումը կարող է էականորեն փոխել իրավիճակը ողջ տարածաշրջանում
3 րոպեի ընթերցում
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ։ Հայաստանը՝ որպես ԵԱՏՄ անդամ պետություն, ունի մեծ ներուժ և ակտիվորեն մասնակցում է ինտեգրացիոն գործընթացներին։
Այս մասին «Արմենպրես»-ի թղթակցի հետ զրույցում ասել է Եվրասիական տնտեսական հանձնաժողովի արդյունաբերության և ագրոարդյունաբերական համալիրի հարցերով նախարար Գոհար Բարսեղյանը և ընդգծել, որ այս համատեքստում, հատկապես, շատ կարևոր է Հայաստանի Հանրապետության կառավարության ներկայացրած «Խաղաղության խաչմերուկ» նախագիծը, որի իրականացումը կարող է էականորեն փոխել իրավիճակը ողջ տարածաշրջանում։
«Տարեսկզբին Եվրասիական տնտեսական բարձրագույն խորհրդի նախագահ, Հայաստանի Հանրապետության վարչապետ Նիկոլ Փաշինյանն իր ուղերձում նշեց Հայաստանի Հանրապետության համար առավել կարևոր և հեռանկարային ոլորտները՝ տրանսպորտի և լոգիստիկայի ոլորտը։ ԵԱՏՄ շրջանակներում չափազանց կարևոր է ուշադրություն դարձնել տրանսպորտային ենթակառուցվածքների արդիականացմանը և տարանցման ներուժի զարգացմանը։ Այս համատեքստում ցանկանում եմ անդրադառնալ ՀՀ կառավարության ներկայացրած «Խաղաղության խաչմերուկ» նախագծին, որի իրականացումը կարող է էականորեն փոխել իրավիճակը ողջ տարածաշրջանում»,- նշել է Բարսեղյանը։
Երկրորդն, ըստ նախարարի, էներգետիկայի և էլեկտրաէներգետիկ ռեսուրսների ընդհանուր շուկաների ձևավորումն է՝ առանց խտրական սկզբունքների։ Այս ուղղությունը պետք է դառնա բոլոր պետությունների համար տնտեսական գործունեության հավասար պայմանների ապահովման հիմք, և դա նույնպես Հայաստանի համար առաջնահերթ ուղղություն է Միության շրջանակներում։
Երրորդ կարևորագույն բաղադրիչը պարենային անվտանգության ապահովմումն է։
Ըստ նախարարի, որոշ ուղղություններով ԵԱՏՄ գործունեության վերաբերյալ հանրային լայն շրջանակների մոտ առկա է տեղեկացվածության ցածր մակարդակը։ Երբեմն քաղաքացիները տեղյակ չեն ԵԱՏՄ-ի կողմից ընձեռվող հնարավորություններից, ուստի Եվրասիական տնտեսական հանձնաժողովը, կողմերի հետ համատեղ, պետք է սերտ համագործակցի՝ տեղեկացվածության մակարդակը բարձրացնելու ուղղությամբ: Գ. Բարսեղյանը՝ մանրամասնելով, որ, օրինակ, անցնող տարում գործարկվել է արդյունաբերական համագործակցության իրականացման մեխանիզմը, ինչը եզակի հնարավորություն է՝ ազդելու իրական տնտեսության զարգացման վրա։