Փուլային տարբերակով ՀՀ-ն կարող է ինքնուրույն իրականացնել հայ-իրանական և հայ-թուրքական սահմանների սահմանապահ ծառայությունը․ ԱԱԾ տնօրեն
1 րոպեի ընթերցում
ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ։ Փուլային տարբերակով Հայաստանը կարող է ինքնուրույն իրականացնել հայ-իրանական և հայ-թուրքական սահմանների սահմանապահ ծառայությունը։ «Արմենպրես»-ի հաղորդմամբ՝ լրագրողների հետ ճեպազրույցում այս մասին ասաց Ազգային անվտանգության ծառայության տնօրեն Արմեն Աբազյանը՝ պատասխանելով հարցին, թե Հայաստանը ի վիճակի է արդյոք հայ-իրանական և հայ-թուրքական սահմաններին ինքնուրույն իրականացնել սահմանապահ ծառայությունը։
«Փուլային տարբերակով, այո, բայց ներկայումս նման որոշում չկա»,- ասաց Աբազյանը։
Աբազյանը հիշեցրեց, որ նախնական պայմանավորվածություն կա, որպեսզի 2025 թվականի հունվարի 1-ից Ագարակ սահմանային վերահսկողության կետում ամբողջական սահմանային ծառայությունն իրականացվի Հայաստանի Հանրապետության սահմանապահ զորքերի կողմից։
«Իսկ ընդհանուր հայ-իրանական սահմանի վերաբերյալ տեղի են ունենում քննարկումներ»,- հավելեց Աբազյանը։
Հարցին, թե Հայաստանը պատրաստվու՞մ է ամբողջ սահմանի պահպանությունը իրականացնել սեփական ռեսուրսներով, Աբազյանը պատասխանեց, որ դեռևս նման որոշում չկա։