Չեմ հասկանում, թե կադաստրն ինչ հիմքով է իրավունք գրանցել այն հատվածներում, որոնք սահմանազատման ժամանակ դարձան խնդրահարույց. փոխվարչապետ
2 րոպեի ընթերցում
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի փոխվարչապետ Մհեր Գրիգորյանը չի տեսնում որևէ իրավական հիմք, քարտեզ, որոնց հիման վրա Կադաստրի կոմիտեն ժամանակին անձանց համար իրավունք է գրանցել այն հատվածներում, որոնք Ադրբեջանի հետ սահմանազատման գործընթացի ժամանակ դարձել են խնդրահարույց:
«Արմենպրես»-ի փոխանցմամբ՝ Գրիգորյանն այս մասին նշեց ԱԺ արտաքին հարաբերությունների հանձնաժողովի նիստում Հայաստանի և Ադրբեջանի միջև սահմանազատման հանձնաժողովների կանոնակարգը վավերացնելու նախագծի քննարկմանը՝ անդրադառնալով «Հայաստան» խմբակցության պատգամավոր Քրիստինե Վարդանյանի դիտարկմանը:
Պատգամավորը, անդրադառնալով Տավուշի հատվածում տեղի ունեցած սահմանազատմանը, նշեց, որ ՀՀ կադաստրի թուղթ ունեցող գույքեր անցել են ադրբեջանական վերահսկողության տակ, որոնց իրավական հիմքն ինքը չի տեսնում:
«Ես ինքս չեմ հասկանում, թե կադաստրն ինչ հիմքով և ինչ քարտեզի հիման վրա է ֆիզիկական անձանց համար իրավունք գրանցել այն հատվածներում, որոնք հետո դարձան պրոբլեմատիկ: Եթե կադաստրն ունի քարտեզ և այդ քարտեզը հիմնավոր ու լեգիտիմ քարտեզ է, մենք ինքներս դելիմիտացիայի ժամանակ կառաջնորդվեինք այդ քարտեզով: 1 կիլոմետրանոց, ավելին ասեմ՝ 5 կիլոմետրանոց շերտում չի կարելի գրանցել իրավունք:Բայց, այնուամենայնիվ, 2004 թվականից տեղի են ունեցել գրանցումներ, որոնց հիմքը ես ինքս դեռևս չեմ կարողացել հասկանալ»,-ասաց Գրիգորյանը՝ հավելելով, որ դրան պետք է տրվի իրավական գնահատական:
Նա շեշտեց՝ վկայական տալը վերջնական գնահատական չէ իրավունք ունենալու կամ չունենալու մասին, այդ իրավունքի տակ պետք է լինի իրավունքը հիմնավորող փաստաթուղթ, որը, ըստ նրա, տվյալ պարագայում ուղղակի գոյություն չունի կամ իրենք այդպես էլ չեն կարողացել գտնել այդ փաստաթուղթը: