Վահագն Խաչատուրյանն ու Կասիմ-Ժոմարտ Տոկայևը ներկա են գտնվել Ղազախստանում Հայաստանի մշակութային օրերի բացմանը

ԱՍՏԱՆԱ, 15 ՀՈԿՏԵՄԲԵՐԻ, ԱՐՄԵՆՊՐԵՍ։ Աստանայում տեղի ունեցավ Ղազախստանում Հայաստանի մշակույթի օրերի միջոցառումների մեկնարկն ազդարարող բացման հանդիսավոր համերգը՝ նվիրված Շառլ Ազնավուրի 100-ամյակին:

«Արմենպրես»-ի թղթակցի հաղորդմամբ՝ Ղազախստանի Քալիբեկ Կուանիշբաևի անվան ազգային երաժշտական դրամատիկական թատրոնում անցկացվող հանդիսավոր համերգին ներկա էին նաև պաշտոնական այցով Աստանայում գտնվող Հայաստանի Հանրապետության նախագահ Վահագն Խաչատուրյանը, Ղազախստանի Հանրապետության նախագահ Կասիմ-Ժոմարտ Տոկաևն, ինչպես նաև ՀՀ նախագահի պատվիրակության կազմում Աստանա ժամանած՝ Հայաստանի Հանրապետության կրթության, գիտության, մշակույթի և սպորտի նախարար Ժաննա Անդրեասյանը և այլ պաշտոնյաներ: 

Հանդիսավոր միջոցառման մեկնարկին ելույթ ունեցավ ՀՀ ԿԳՄՍ նախարար Ժաննա Անդրեսայանն, ով, ողջունելով ներկաներին, ջերմ ընդունելության համար շնորհակալություն հայտնեց Ղազախստանի Հանրապետության մշակույթի և տեղեկատվության նախարարությանը Ղազախստանում Հայաստանի մշակույթի օրերը հյուրընկալելու համար:

«Մեզ համար մեծ պատիվ է ՀՀ նախագահ պարոն Խաչատուրյանի՝ Ղազախստան այցի շրջանակներում Ղազախստանի մշակութասեր հասարակությանը ներկայացնել հայկական մշակույթը և կրկնակի պատվաբեր է ու պատասխանատու, քանի որ այսօրվա մեր հանդիսավոր բացման համերգին ներկա են երկու երկրների նախագահները», - ասաց Ժաննա Անդրեասյանն՝ ընդգծելով, որ մշակույթի օրերի ծրագրի առանցքը կարևոր երկու մեծանուն հայ արվեստագետների՝ Շառլ Ազնավուրի և Սերգեյ Փարաջանովի ստեղծագործական ժառանգության ներկայացումն է, և դա պատահական չէ, քանի որ այս տարի ողջ աշխարհը նշում է նրանց հոբելյանները:

ՀՀ ԿԳՄՍ նախարարի խոսքով՝ պատահական չէ նաև ընտրված թատերախումբը, որը կրում է Սոս Սարգսյանի անունը. դերասան, որին վստահաբար ճանաչում և հիշում է նաև Ղազախստանի հանրությունը:

«Նրանք բոլորն ամեն մեկն իր ինքնատիպ ոճով խոսել են մշակութային երկխոսության, մշակույթների փոխճանաչման անհրաժեշտության և մշակույթների փոխազդեցության վերաբերյալ, իրենց կյանքով ու գործով փաստել մշակույթի միավորող ուժի անհաղթահարելիության մասին», - նշեց Ժաննա Անդրեասյանը՝ հավելելով, որ ինքը ևս ցանկանում է խոսել հայ և ղազախ ժողովուրդների մշակութային երկխոսության մասին, որոնց վառ արտահայտությունն են ղփչաղական ձեռագրերը և որոնք մեծ հոգածությամբ և խնամքով պահվում են Երևանի Մեսրոպ Մաշտոցի անվան հին ձեռագրերի ինստիտուտ-մատենադարանում, որտեղ 2024 թվականի գարնանը հյուրընկալվել է Ղազախստանի նախագահ Կասիմ-Ժոմարտ Տոկաևը:

Նախարարի դիտարկմամբ՝ երկու երկրների միջև մշակութային համագործակցությունը շարունակում է զարգանալ՝ ընդգրկելով արվեստի գրեթե բոլոր ուղղությունները:

«2010 թվականից Երևանի պետական համալսարանում գործում է ԱՊՀ տարածաշրջանում առաջինը բացված ղազախական լեզվի, պատմության և մշակույթի պատմության կենտրոնը, որը կրում է ղազախ հանրահայտ մտավորական Աբայ Կունանբաևի անունը, իսկ 2016 թվականից Հայաստանի ազգային գրադարանում բացվել է ղազախական գրականության կենտրոնը», - ասաց Անդրեասյանը՝ շեշտելով, որ երկու երկրների մշակութային գործիչները հաջողությամբ համագործակցում և հանդիպում են երկու պետություններում անցկացվող փառատոնային և մրցութային հարթակներում:

Նրա խոսքով՝ 2018 թվականին Երևանի մետրոպոլիտենի 3 կայարաններում ՀՀ-ում Ղազախստանի դեսպանության նախաձեռնությամբ՝ բացվել է «Աշխարհի մայրաքաղաքները՝ Աստանայից Երևան» խորագիրը կրող ցուցահանդեսը, որը նվիրված է եղել Աստանայի հիմնադրման 20 և Երևանի հիմնադրման 2800-ամյակներին: Բացի այդ, կայացել է «Աբաևյան ընթերցումներ» գրական-երաժշտական երեկոն՝ Հայաստանի և Ղազախստանի գրական մտավորականության մասնակցությամբ: 

«Համոզված եմ, որ մեր համագործակցությունը կշարունակվի նոր ձևաչափերով՝ նպաստելով մեր երկու ժողովուրդների միջև մշակութային համագործակցության հետագա զարգացմանն ու երկու պետությունների` Հայաստանի ու Ղազախստանի բարգավաճմանն ու բարօրությանը», - եզրափակեց ՀՀ ԿԳՄՍ նախարարը՝ ևս մեկ անգամ շնորհակալություն հայտնելով Ղազախստանում Հայաստանի մշակույթի օրերն անցկացնելու համար:

Ղազախստանի Հանրապետության մշակույթի և տեղեկատվության նախարար Աիդա Բալաևան, ողջունելով հյուրերին և ներկաներին, իր ուրախությունը հայտնեց, որ Հայաստանի մշակույթի օրերը վերջապես հասել են Ղազախստան:

«Սրտանց շնորհավորում եմ Հայաստանի եղբայրական ժողովրդին հյուրընկալ ղազախական հողում», - նշեց Բալաևան՝ հավելելով, որ ղազախ ժողովրդին հոգեհարազատ է հայ ժողովրդի մեծ մշակույթը, քանի որ երկու ժողովուրդներն էլ մեկ միասնություն են կազմում:

Ղազախստանի Հանրապետության մշակույթի և տեղեկատվության նախարարը նաև նշեց, որ բարեկամ երկրների մշակույթի օրերը ղազախ ժողովրդի համար կարևորագույն միջազգային իրադարձություններ են հանդիսանում ու երկրների և ժողովուրդների միջև գործընկերային հարաբերությունների գրավական են:

«Համոզված եմ, որ Հայաստանի մշակույթի օրերը կանցնեն հետաքրքիր ու հագեցած և էլ ավելի կմտերմացնեն մեր ժողովուրդներին: Այդ օրերի շրջանակներում ղազախստանցի հանդիսատեսը առաջին անգամ կծանոթանա Հայաստանի արվեստին ու ավանդույթներին և ես նաև համոզված եմ՝ հետագայում սա կդառնա բարի ավանդույթ», - նշեց ղազախ նախարարը:

Վերջինիս խոսքով՝ միջոցառման իրականացումն, անկասկած, հնարավոր է դարձել Հայաստանի և Ղազախստանի ղեկավարների բարեկամական հարաբերությունների շնորհիվ:

«Համոզված եմ, որ Հայաստանի մշակույթի օրերը նոր խթան կհանդիսանան երկու երկրների մշակութային և հոգևոր արժեքների հետագա զարգացման համար», - եզրափակեց Աիդա Բալաևան՝ մասնակիցներին մաղթելով ստեղծագործական ներշնչանքներ, իսկ հանդիսատեսին՝ անմոռանալի տպավորություններ:

Քալիբեկ Կուանիշբաևի անվան թատրոնի ճեմասրահում բացված էր Սերգեյ Փարաջանովի կյանքին ու գործունեությանը նվիրված լուսանկարչական ցուցահանդեսը՝ պատրաստված Փարաջանովի թանգարանի կողմից։

Համերգի ընթացքում հիմնականում ներկայացված էին շանսոնյեի երգերը, բայց հնչեցին նաև Կոմիտասի և Առնո Բաբաջանյանի ստեղծագործությունները։

ՀՀ ԿԳՄՍՆ հաղորդմամբ՝ Մշակույթի օրերի ծրագրում ներառված են մի շարք միջոցառումներ` hանդիսավոր համերգ Հայաստանի ջազ նվագախմբի (գեղարվեստական ղեկավար` Դավիթ Մելքոնյան) մասնակցությամբ, ֆոտոցուցահանդես՝ նվիրված Սերգեյ Փարաջանովին, հայկական կինոյի օրեր և Սոս Սարգսյանի անվան «Համազգային» թատրոնի (գեղարվեստական ղեկավար` Նարինե Գրիգորյան) հյուրախաղը։

Հաջորդ օրը՝ հոկտեմբերի 16-ին, Ղազախստանի Քալիբեկ Կուանիշբաևի անվան ազգային երաժշտական-դրամատիկական թատրոնում հանդես կգա Սոս Սարգսյանի անվան «Համազգային» թատրոնը՝ «Լյու Բյոֆ» ներկայացմամբ։ 

Ղազախստանում Հայաստանի մշակույթի օրերի շրջանակում 7 IMAX KERUEN կինոթատրոնում կցուցադրվեն հայկական խաղարկային և անիմացիոն ֆիլմեր։

Հեղինակ՝ Դավիթ Մամյան

Լուսանկարները՝ Հայկ Մանուկյանի