100 մլն դոլարի վարկ՝ Կայունացման և զարգացման եվրասիական հիմնադրամից. ԱԺ հանձնաժողովը հավանություն տվեց համաձայնագրին
2 րոպեի ընթերցում
ԵՐԵՎԱՆ, 11 ՀՈԿՏԵՄԲԵՐԻ, ԱՐՄԵՆՊՐԵՍ: Ազգային ժողովի ֆինանսավարկային և բյուջետային հարցերի մշտական հանձնաժողովը հավանություն տվեց Հայաստանի և Եվրասիական զարգացման բանկի միջև վարկային համաձայնագրին, որով Հայաստանը նախատեսում է ներգրավել 100 մլն դոլարի բյուջետային աջակցության վարկ:
«Արմենպրես»-ի փոխանցմամբ՝ Հայաստանի Հանրապետության և Եվրասիական զարգացման բանկի միջեւ «Կայունացման եւ զարգացման եվրասիական հիմնադրամի միջոցներից ֆինանսական վարկի տրամադրման մասին» համաձայնագիրը վավերացնելու մասին նախագիծը հանձնաժողովի նիստում ներկայացրեց ՀՀ ֆինանսների փոխնախարար Էդուարդ Հակոբյանը:
«Խոսում ենք 100 մլն դոլար վարկի մասին: Սա ծրագիր է՝ տնտեսության ներուժի բարձրացման ուղղությամբ: Դրա ներքո իրականացվելու են բարեփոխումներ, որոնք ուղղված են տնտեսության ներուժի բարձրացմանը»,-ասաց Հակոբյանը:
Վարկը տրամադրվում է 4 տոկոս ֆիքսված տոկոսադրույքով, 20 տարի ժամկետով, որից 10 տարին՝ արտոնյալ:
Ծրագրի շրջանակներում թիրախավորված է արտահանման բաղադրիչը: Ծրագրի շրջանակներում Էկոնոմիկայի նախարարությունը մշակել է արտահանման ռազմավարության հայեցակարգ: «Դա նաև գալիս է՝ փարատելու արտահանման շուկաների դիվերսիֆիկացման հարցը»,-նշեց փոխնախարարը:
Համաձայնագիրը վավերացնելու մասին նախագիծը կքննարկվի ԱԺ առաջիկա նիստում:
Երկրորդ ծրագիրը ներդրումների ներգրավման վերաբերյալ է: Նշվում են այն կարևոր միջոցառումները, որ կառավարությունը պետք է իրականացնի ներդրումների խթանման ուղղությամբ:
Երրորդ ուղղությունը տնտեսապես բարդ ապրանքների արտադրությամբ զբաղվող ընկերություններին պետական աջակցության տրամադրումն է: