1 րոպեի ընթերցում
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ։ Ճապոնիայի հարավ-արևմուտքում գտնվող Միյաձակիի օդանավակայանի թռիչքուղին փակվել է այնտեղ որոտացած պայթյունից հետո։ Միջադեպի հետևանքով տուժածներ չկան։ «Արմենպրես»-ի փոխանցմամբ՝ այս մասին հաղորդում է Kyodo գործակալությունը։
Ըստ հրապարակման՝ օդանավակայանում հաճախ են հայտնաբերվում Երկրորդ աշխարհամարտից մնացած ամերիկյան չպայթած ռումբեր, այդ պատճառով Ճապոնիայի ցամաքային ինքնապաշտպանության ուժերի հատուկ ջոկատ է ուղարկվել՝ պայթյունը հետաքննելու։
Ըստ երկրի Տրանսպորտի նախարարության՝ թռիչքուղու վրա առաջացել է 7 մետր տրամագծով և 1 մետր խորությամբ փոս։
Ոստիկանությունն օդանավակայանի աշխատակիցներին հրահանգել է տարհանվել։
Միջադեպից հետո օդանավակայանի սպասասրահներում մեծ հերթեր են գոյացել։