1 րոպեի ընթերցում
ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ։ Հանցագործության մասին հաղորդում տվող, իրավապահ մարմինների հետ համագործակցող անձանց համար պետք է ստեղծել մաքսիմալ հարմարավետություն և հարգանք։
«Արմենպրես»-ի հաղորդմամբ՝ կառավարության նիստի ժամանակ այս մասին ասաց վարչապետ Նիկոլ Փաշինյանը։
«Պետք է իրադրությունն այնպես լինի, որ հանցագործության մասին հայտնած անձը զգա, որ ինքը լավ բան է արել և իրեն չեն պատժում դրա համար։ Նաև հանցանքի մասին հայտնած անձի ինքնության և գաղտնիության պաշտպանությունն ու ապահովումն է կարևոր»,- ասաց վարչապետը։
Փաշինյանը հավելեց՝ լինում են դեպքեր, երբ հանցանք կատարողները և նրանց հարազատներն ու ընկերները գիտեն, թե ով է հաղորդում տվողը։ «Դա անթույլատրելի է, խնդրում եմ այս հարցին ուշադրություն դարձնել»,- դիմելով իրավապահ մարմինների ներկայացուցիչներին՝ նշեց վարչապետը։