2 րոպեի ընթերցում
ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ: Որոշ դասընթացներին մասնակցությունը պարտադիր կդառնա բուժաշխատողների համար:
«Արմենպրես»-ի փոխանցմամբ՝ «Բնակչության բժշկական օգնության և սպասարկման մասին» օրենքում լրացումներ կատարելու մասին օրենքի նախագիծն ԱԺ նիստում ներկայացրեց Առողջապահության փոխնախարար Լենա Նանուշյանը:
Ներկայումս յուրաքանչյուր հնգամյա շրջափուլում ավագ բուժաշխատողների համար նախատեսված է 220 ՇՄԶ (շարունակական մասնագիտական զարգացման) կրեդիտ, դեղագետների համար՝ 160 ՇՄԶ կրեդիտ, միջին բուժաշխատողների համար՝ 140 ՇՄԶ կրեդիտ, դեղագործների համար՝ 100 ՇՄԶ կրեդիտ: Նշված կրեդիտները բուժաշխատողները ձեռք են բերում՝ մասնակցելով տարբեր դասընթացների, համաժողովների, գիտական աշխատանքների, ինչպես նաև արտերկրի համալսարանական կլինիկաներում, գիտահետազոտական կենտրոններում վերապատրաստման դասընթացներին մասնակցության միջոցով:
Կրեդիտավորված միջոցառումներին մասնակցությունը կամավոր է, բուժաշխատողն ինքն է որոշում, թե իր մասնագիտության վերաբերող որ միջոցառմանը մասնակցի:
«Ներկայումս հաշվի առնելով արտաքին մարտահրավերները, ինչպես նաև նոր ձևավորվող մշակույթները, օրինակ՝ վերջերս ընդունված բուժաշխատողի մասնագիտական էթիկայի կանոնները՝ անհրաժեշտ է որոշ դասընթացներ պարտադիր դարձնել բուժաշխատողների համար՝ ապահովել տարբեր իրավիճակներում նրանց պատրաստվածության բարձր մակարդակ»,-ասաց Լենա Նանուշյանը:
Նախագծով միաժամանակ նախատեսվում է օտարերկրյա և միջազգային կազմակերպությունների կողմից կազմակերպվող շարունակական մասնագիտական զարգացումն ապահովող միջոցառումներին մասնակցելու համար նախատեսել բուժաշխատողի մասնակցության համար որոշակի չափով փոխհատուցում՝ դրանով նպաստելով միջազգային կրթական միջոցառումների բարձր մասնակցությունը: