Հարավային Կորեան կընդլայնի ՌԴ և Բելառուս արտահանման համար արգելված ապրանքների ցուցակը
2 րոպեի ընթերցում
![Հարավային Կորեան կընդլայնի ՌԴ և Բելառուս արտահանման համար արգելված ապրանքների ցուցակը](http://armenpress.am/resized/480/storage/images/articles/2024/09/05/xrlfPyR8G9wAlnvCPFqRZyg6s9oxyRm09YX9yG8d.webp)
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Հարավային Կորեան կընդլայնի այն ապրանքների ցուցակը, որոնց վրա սահմանափակումներ են տարածվում Ռուսաստան և Բելառուս արտահանման համար: «Արմենպրես»-ի փոխանցմամբ՝ այս մասին հաղորդում է Yonhap գործակալությունը՝ հղում անելով Հարավային Կորեայի արդյունաբերության նախարարությանը։
«Կառավարությունը կխստացնի պայքարը ռազմավարական նշանակության ապրանքների չարտոնագրված արտահանման և այլ անօրինական դեպքերի դեմ», - ասվում է նախարարության հաղորդագրության մեջ։
Արդյունաբերության նախարարության տվյալներով՝ Սեուլը Ռուսաստան և Բելառուս մատակարարման համար արգելված ապրանքների ցանկում ավելացրել է ևս 243 անուն ապրանք, որոնք կարող են օգտագործվել ռազմական նպատակներով։
Դրանց թվում են մետաղահատ հաստոցները, հաստոցաշինության համար բաղադրամասերը, օպտիկական սարքերի համար մասերը և տվիչները։
Բացի այդ, Հարավային Կորեայի կառավարությունն ուղղումներ է մտցրել արգելված ռազմավարական ապրանքների արտահանման խախտումների համար վարչական միջոցների վերաբերյալ որոշման մեջ, որպեսզի խստացվի պատիժն արտահանման արգելքը խախտողների համար:
Նշվում է, որ փոփոխություններն ուժի մեջ կմտնեն սեպտեմբերի 9-ին։
Այսպիսով, ապրանքների ընդհանուր թիվը, որոնց արտահանումը Ռուսաստան և Բելառուս սահմանափակվել է, ներկայիս 1159-ից կհասնի 1402-ի։