Պատմության գանձերը. Ք.ա. 9-ից 5-րդ դարերին թվագրվող արձանիկների խումբը՝ մեկ միասնական պաշտամունքի ապացույց
2 րոպեի ընթերցում
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Ք․ա․ 9-ից 5-րդ դարերին թվագրվող կանանց և տղամարդկանց ձուլածո ֆիգուրաները հայտնաբերվել են Պառավաքարի և Այրումի հնագիտական հուշարձաններից:
«Արմենպրես»-ի հետ զրույցում Հայաստանի պատմության թանգարանի հնագիտության և դրամագիտության բաժնի վարիչ Աստղ Պողոսյանը նշեց, որ 1962 թվականին երկաթուղու Այրում կայարանի շինարարության ժամանակ աշխատակիցները պատահական բացում են հնագիտական դամբարան, որը պարունակում էր մոտ 200 փոքր մարդակերպ և կենդանակերպ արձանիկներ: Սակայն մասնագետներին հաջողվում է գտնել և թանգարան տեղափոխել արձանիկներից 32-ը: Հետագայում 1968 թվականին նմանատիպ արձանիկներ գտնվում են Տավուշի մարզի Պառավաքար գյուղից:
«Մարդակերպ արձանիկները իրենց տեսակով շատ հետաքրքիր են, այս արձանիկները ժամանակագրորեն տարբերվում են՝ Պառավաքարից հայտնաբերվածները թվագրվում են Ք․ա․ 9-րդ դարով, իսկ Այրումինը՝ Ք․ա․ 6-5-րդ դարերով:
Հարթակի վրա կանգնած կանանց և տղամարդկանց արձանները պատկերված են մերկ: Դրանք միաձույլ են՝ պատրաստված բարձրորակ բրոնզից: Դետալները բավականին մանրամասն են արված՝ ի տարբերություն դեմքի:
Կանանց արձանիկները վզին կրում են ոլորուն հաստ մանյակ: Առաջ մեկնած ձախ ձեռքում բռնել են տանձաձև սափոր՝ արմունկում ծալված, աջում` եղջյուրաձև գավաթ: Տղամարդիկ արդեն պատկերված են զինվորի տեսքով և շատ ակնհայտ երևում են նրանց զենքերը՝ վահաններ, դաշույններ և նիզակներ, ինչպես նաև՝ գլխի վրա սաղավարտներ»,-ասաց հնագիտության և դրամագիտության բաժնի վարիչ Աստղ Պողոսյանը:
Մասնագետն ընդգծեց՝ արձանիկների հայտնաբերումը Հայաստանի տարբեր տարածաշրջաններից խոսում է մեկ ընդհանուր պաշտամունք ունենալու մասին:
Հեղ. Գայանե Գաբոյան
Լուսանկարիչ՝ Հայկ Բադալյան
Օպերատոր՝ Հովհաննես Մկրտչյան