ԳՅՈՒՄՐԻ, 9 ՀՈՒԼԻՍ, ԱՐՄԵՆՊՐԵՍ: Վերանորոգումից հետո, հուլիսի 9-ին վերաբացվեց ՀՀ աշխատանքի և սոցիալական հարցերի նախարարության «Շիրակի մարզի երեխայի և ընտանիքի աջակցության կենտրոն»-ը։ Ինչպես տեղեկացնում է «Արմենպրես»-ը, կենտրոնում իրականացվել է ինչպես վերանորոգման, այնպես էլ գույքային հագեցման աշխատանքներ։ Ծրագրի շրջանակներում իրականացվել են նաև անձնակազմի վերապատրաստման աշխատանքներ։
Կենտրոնի վերաբացմանը ներկա էին ՀՀ աշխատանքի և սոցիալական հարցերի նախարար Նարեկ Մկրտչյանը, ՅՈՒՆԻՍԵՖ-ի, «Վորլդ Վիժն»-ի, Հայաստանում Արգենտինայի դեսպանատան ներկայացուցիչներ, հյուրեր։
Կենտրոնը վերանորոգվել և կահավորվել է 2024 թվականին՝ ԱՍՀ նախարարության նախաձեռնությամբ, ՅՈՒՆԻՍԵՖ-ի և «Վորլդ Վիժն Հայաստան»-ի կողմից, Արգենտինայի հայ համայնքի և «Հայաստան» համահայկական հիմնադրամի աջակցությամբ։ Ծրագրի ընդհանուր գումարը կազմել է հարյուր միլիոն դրամ։
«Սոցիալական տարբեր ոլորտներում վերջին տարիներին ակտիվ համագործակցել ենք շահագրգիռ կողմերի հետ: Բացի շենքային պայմաններից, մենք ոլորտում դեռ շատ անելիքներ ունենք՝ մասնագիտական կարողությունների և ինստիտուցիոնալ զարգացման առումով։ Այսօր շատ ուրախ եմ, որ երեխաները շատ ավելի լավ միջավայրում են շարունակելու ապրել»,- նշեց Նարեկ Մկրտչյանը:
«Շիրակի մարզի երեխայի և ընտանիքի աջակցության կենտրոն» -ում 2021 թվականից սոցիալական աջակցություն են ստանում կյանքի դժվարին իրավիճակում հայտնված 0-18 տարեկան երեխաները։
Արմենուհի Մխոյան