2 րոպեի ընթերցում
ԵՐԵՎԱՆ, 8 ՀՈՒԼԻՍԻ, ԱՐՄԵՆՊՐԵՍ։ Իրանի Իսլամական Հանրապետության արտաքին գործերի նախարարության ներկայացուցիչ Նասեր Քանանին հայտարարել է, որ Թեհրանը կարևոր դեր է խաղացել կովկասյան ճգնաժամի կարգավորման գործում։
«Արմենպրես»-ի հաղորդմամբ՝ այս մասին հայտնում է IRNA գործակալությունը՝ վկայակոչելով Իրանի ԱԳՆ պաշտոնական ներկայացուցչի խոսքերն, ով նաև ընդգծել է, որ երկրի վարչակազմը զգալի ձեռքբերումներ է ունեցել բարիդրացիության և բազմակողմանիության իր քաղաքականության մեջ։
Իրանի ԱԳՆ պաշտոնական ներկայացուցիչը նաև կարծիք է հայտնել, որ Իրանի կառավարությունը կարող է օգտագործել միջազգային կազմակերպությունների հնարավորությունները՝ լուծելու միջազգային կարևոր խնդիրներ և դառնալ Եվրասիական տնտեսական միության արդյունավետ անդամ։
Նասեր Քանանին մատնանշել է հարևան երկրների հետ մշակութային, առևտրային և քաղաքական հարաբերությունների խթանումը, տարածաշրջանային որոշ երկրների հետ կապերի վերականգնումը, որոնց հետ երկիրը խզել է կապերը, ինչպես նաև Իրանի արդյունավետ դերը տարածաշրջանային և արտատարածաշրջանային համագործակցության ամրապնդման, անվտանգության և կայունության ստեղծման գործում:
Քանանին նաև հավելել է, որ Թեհրանի օրակարգում է նաև տարածաշրջանում ահաբեկչության դեմ պայքարում համագործակցության մեջ առաջատար դեր խաղալը։