Պետրակովը ղազախների դեմ տոնած հաղթանակն ամբողջ թիմի լավ աշխատանքի արդյունքն է համարում

ԵՐԵՎԱՆ, 7 ՀՈՒՆԻՍԻ, ԱՐՄԵՆՊՐԵՍ: Հայաստանի ֆուտբոլի ազգային թիմի գլխավոր մարզիչ Ալեքսանդր Պետրակովը Ղազախստանի նկատմամբ տոնած հաղթանակում բարձր է գնահատում ամբողջ թիմի աշխատանքը:

«Ինձ դուր եկավ հանդիպման մեկնարկային 25 րոպեները: Որևէ մեկին չեմ առանձնացնի, այլ ամբողջ թիմին: Լավ աշխատեցին թիմի բոլոր ֆուտբոլիստները»,- «Արմենպրես»-ի հաղորդմամբ` լրագրողների հետ զրույցում ասել է Պետրակովը:

Վերջինս նաև շնորհակալություն է հայտնել երկրպագուներին, որոնք ներկա էին ընկերական խաղին:

«Շնորհակալ եմ նաև բոլորին` իմ նկատմամբ ջերմ վերաբերմունքի համար: Հայերն իմ կողքին են ամեն իրավիճակում»,-առանձնացրել է մասնագետը:

Խոսելով Ազգերի լիգայից առաջ ունեցած ընկերական խաղերից` Պետրակովն առանձնացրել է, որ ստուգողական խաղերը դրական արդյունք են տվել և օգնել են թիմի կազմավորմանը:

Հայաստանի ֆուտբոլի ազգային թիմն ընկերական խաղի շրջանակներում Վազգեն Սարգսյանի անվան Հանրապետական մարզադաշտում հյուրընկալեց Ղազախստանին և առավելության հասավ 2:1 հաշվով: