2022 թվականի վերջի տվյալներով՝ հիփոթեքային վարկ ունեցողների 14 տոկոսը երկուսից ավելի հիփոթեքային վարկ է ունեցել

ԵՐԵՎԱՆ, 3 ԱՊՐԻԼԻ, ԱՐՄԵՆՊՐԵՍ: 2023 թվականին Հայաստանում պահպանվել է հիփոթեքային վարկերի տրամադրման աճը։ «Արմենպրես»-ի հաղորդմամբ՝ այդ մասին հունիսի 3-ի ասուլիսում հայտնեց ՀՀ կենտրոնական բանկի նախագահ Մարտին Գալստյանը։

«2023 թվականին նոր տրամադրվող հիփոթեքային վարկերի մեծածավալ աճը պահպանվել է, ինչը միաժամանակ ուղեկցվել է նաև անշարժ գույքի գների շարունակական աճով։ Դրանք փոխսնուցվող աճեր են, ինչը հիփոթեքային շուկայում հնարավոր գերտաքացման ռիսկերի առկայության մասին կարող է վկայել։ Միաժամանակ, վարկային ռեգիստրի միկրոտվյալների վերլուծությունը ցույց է տալիս, որ մեկից ավելի հիփոթեքային վարկ ունեցողների կշիռը 2017-18 թվականներից սկսած աճել է։ 2022 թվականի վերջի դրությամբ երկուսից ավելի հիփոթեքային վարկ ունեցողների տեսակարար կշիռն ընդհանուր պորտֆելում կազմել է մոտավորապես 14 տոկոս։ Երեք հիփոթեքային վարկ է ունեցել բնակչության 4 տոկոսը»,- հայտնեց Մարտին Գալստյանը։

Նա ընդգծեց, որ Հայաստանի բանկային համակարգը ներկայումս բնութագրվում է կապիտալի և իրացվելիության բավականին բարձր բուֆերների պաշարներով, ուստի բանկային համակարգի համար իրականացված մակրո սթրես թեստավորման ամփոփ արդյունքները վկայում են, որ նույնիսկ խիստ վատատեսական սցենարի դեպքում համակարգն ունակ է կլանել հնարավոր կորուստները՝ պահպանելով ֆինանսական միջնորդության անընդհատությունը։ Այնուամենայնիվ, կան նաև աճող անորոշություններ, որոնցով պայմանավորված համակարգային ցիկլային ռիսկերի նյութականացման հավանականությունը ԿԲ-ն բարձր է գնահատում։

Նշվեց, որ տարվա ընթացքում վարկային շուկայում զարգացումներից ածանցված ցիկլային ռիսկերն ընդհանուր առմամբ հավասարակշռված են եղել։ «Այն ոչ թերագնահատված է, ոչ էլ՝ գերագնահատված։ Բացառություն է հիփոթեքային վարկավորման ոլորտը, որտեղ պահպանվել են նախորդ տարիներին դիտված ծավալային աճի միտումները։ Տարվա ընթացքում ակտիվությունն աճել է նաև սպառողական վարկերի շուկայում»,- նշեց Մարտին Գալստյանը։

Նա տեղեկացրեց նաև, որ աշխարհաքաղաքական բարձր անորոշությունների միջավայրում Կենտրոնական բանկը, կարևորելով համակարգային ռիսկերի կառավարման ապագային միտված մոտեցումը, նախորդ տարվա ընթացքում 0.5 տոկոսային կետով բարձրացրել է կապիտալի հակացիկլիկ բուֆերի դրույքաչափը՝ 2023 թվականի օգոստոսից այն սահմանելով ռիսկով կշռված ակցիզների 1.5 տոկոսի չափով։ Վերջինս նպատակ ունի բարձրացնելու բանկային համակարգի ամրության պաշարները, նաև որոշակիորեն կանխելու հնարավոր ռիսկերի կուտակումը համակարգում։