Նիկոլ Փաշինյանը ժամանել է Իրան՝ մասնակցելու Ռայիսիի և մյուս պաշտոնյաների հրաժեշտի արարողությանը

ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ։ Հայաստանի վարչապետ Նիկոլ Փաշինյանը ժամանել է Իրան՝ մասնակցելու Իրանի նախագահ Էբրահիմ Ռայիսիի, արտաքին գործերի նախարար Հոսեյն Ամիր Աբդոլլահիանի և նրանց ուղեկցող մյուս պաշտոնյաների հրաժեշտի արարողությանը, որոնք զոհվել են ուղղաթիռի վթարի հետևանքով։

Ինչպես հաղորդում է «Արմենպրես»-ը, այս մասին հայտնում է Mehrnews-ը։

Վարչապետ Նիկոլ Փաշինյանի գլխավորած պատվիրակության կազմում են նաև ՀՀ ԱԳ նախարար Արարատ Միրզոյանը և փոխվարչապետ Մհեր Գրիգորյանը։

Նշվում է, որ հրաժեշտի արարողությունը տեղի կունենա մայիսի 22-ի երեկոյան, որին ներկա կլինեն Իրանի նախագահի պաշտոնակատար Մոհամմադ Մոխբերը և արտաքին գործերի նախարարի պաշտոնակատար Ալի Բաղերի Քանին։

Նախագահ Ռայիսիի ուղղաթիռի վթարի հետևանքով զոհված պաշտոնյաների հրաժեշտի արարողությանը մասնակցելու համար մայիսի 22-ին Իրան կժամանեն օտարերկրյա տարբեր բարձրաստիճան պատվիրակություններ։