3 րոպեի ընթերցում
ՊԵԿԻՆ, 7 ՄԱՐՏԻ, ԱՐՄԵՆՊՐԵՍ։ Բոլոր հակամարտությունները պետք է կարգավորվեն բանակցային սեղանի շուրջ, և որքան շուտ սկսվեն բանակցությունները, այնքան շուտ խաղաղություն կհաստատվի։ Ինչպես Պեկինից հայտնում է «Արմենպրես»-ի թղթակիցը, այս մասին մարտի 7-ին հայտարարեց Չինաստանի Ժողովրդական Հանրապետության արտաքին գործերի նախարար Վանգ Յին։
«Մեր բոլոր ջանքերը մատնանշում են մեկ նպատակ, այն է՝ ճանապարհ հարթել հակամարտությունը դադարեցնելու և խաղաղ բանակցություններ սկսելու համար»,- ասաց Չինաստանի արտգործնախարարը՝ պատասխանելով Ռուսաստան-Ուկրաինա հակամարտության մասին հարցին։
Նա հավելեց, որ Պեկինը աջակցում է խաղաղության միջազգային համաժողովի անցկացմանը, որն նախատեսում է բոլոր կողմերի հավասար մասնակցությունը։ ԱԳ նախարարն ընդգծեց, որ միջազգային համաժողովը պետք է ճանաչվի թե՛ Ռուսաստանի, թե՛ Ուկրաինայի կողմից և ապահովի արդար քննարկումներ խաղաղության ծրագրերի վերաբերյալ։
Մյուս հարցերում Չինաստանի ԱԳ նախարարը հույս հայտնեց, որ Չինաստան-Եվրամիություն հարաբերությունները առաջ կընթանան «սահուն կերպով կանաչ լույսերի տակ»։
«Երկու կողմերը պետք է արդարացիորեն բնութագրվեն որպես գործընկերներ: Համագործակցությունը պետք է լինի հարաբերությունների որոշիչ հատկանիշը, ինքնավարությունը՝ դրա առանցքային արժեքը, իսկ ապագան լինի փոխշահավետ», - ասաց նա:
Չինաստանի ԱԳ նախարարը հայտարարեց առանց վիզայի քաղաքականություն եվրոպական 6 երկրների համար՝ Շվեյցարիա, Իռլանդիա, Հունգարիա, Ավստրիա, Բելգիա և Լյուքսեմբուրգ։ Նա հայտնեց նաև, որ իրենք շարունակելու են ընդլայնել առանց վիզայի ռեժիմի «բարեկամների շրջանակը»։
Չինաստանի արտգործնախարարը «Գոտի և ճանապարհ» նախաձեռնությունը բնութագրեց որպես «համընդհանուր զարգացման շարժիչ և աշխարհի արդիականացման արագացուցիչ»: Նրա խոսքով՝ ներկա «միջազգային անկայուն միջավայրում» Չինաստանը հաստատապես «խաղաղության, կայունության և առաջընթացի ուժ» է լինելու։
Խոսելով Չինաստան-ԱՄՆ հարաբերությունների մասին՝ Վանգ Յին հայտնեց, որ խաղաղ գոյակցությունը հարաբերությունների հիմքն է՝ շեշտելով՝ հակամարտության հետևանքները «անպատկերացնելի» են։
ԱԳ նախարարը նշեց, որ Չինաստանն աջակցում է Պաղեստինին՝ դառնալու ՄԱԿ-ի լիիրավ անդամ։
Վանգ Յին նաև մեծ կարևորություն հատկացրեց արհեստական ինտելեկտի համաշխարհային կառավարման զարգացմանն ու անվտանգությանը։