Տարբերակներից մեկը վճարված գումարի չափով Հայաստանի պարտքից նվազեցումն է. Փաշինյանը՝ ՌԴ-ի կողմից սպառազինությունը չմատակարարելու մասին

ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի վարչապետ Նիկոլ Փաշինյանը հաստատել է, որ Հայաստանը սպառազինության համար գումար է վճարել Ռուսաստանին, իսկ այդ երկիրը դեռևս չի մատակարարել սպառազինությունը։ Փաշինյանը նշել է, որ այդ հարցը քննարկումների փուլում է։

«Իհարկե, նման խնդիրներ կան: Տեղի են ունենում քննարկումներ, թե ինչ մեխանիզմներով այդ խնդիրը լուծել: Տարբերակներից մեկը կարող է լինել վճարված գումարների չափով, օրինակ, Ռուսաստանի Դաշնությանը Հայաստանի Հանրապետության ունեցած պարտքից նվազեցումը, որը տարբերակներից մեկն է, միակ տարբերակը չէ»,- «Արմենպրես»-ի փոխանցմամբ՝ ասաց վարչապետը:

Փաշինյանը հավելեց՝ Ռուսաստանն ինքը սպառազինությունների կարիք ունի, և Հայաստանը տրամադրված է աշխատանքային: Նա հույս հայտնեց, որ քննարկումները կբերեն կոնկրետ արդյունքների: