3 րոպեի ընթերցում
ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: «Արմենպրես»լրատվական գործակալությունը ներկայացնում է իր հեղինակային «Նոր գիրք» նախագիծը: Այն ամեն երկուշաբթի ընթերցողի դատին է հանձնում հայաստանյան հրատարակչությունների լույս ընծայած գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի մասին, ծանոթանալ դասական գործերին և արդի գրականության զարգացման միտումներին: Այս շաբաթ«Արմենպրես»-ն առանձնացրել է 2023 թվականին հրատարակված և հանրության դատին հանձնված տարբեր հրատարակչությունների ուշագրավ գրքեր՝ տարբեր խորագրերի ներքո:
Հայ գրականություն
Դերենիկ Դեմիրճյան, «Քաջ Նազար», «Անցյալի ուրուներ», «Նրանց ժպիտը»
«Իմ գրադարանը» մատենաշարով լույս է տեսնում Դերենիկ Դեմիրճյանի ստեղծագործությունների ժողովածուն: Նրա բոլոր ստեղծագործություններում նկատելի է մարդկային կյանքի անարդարությունների պատճառը վերհանելու, պարզաբանելու գրողի ձգտումը: Դեմիրճյանի բոլոր հերոսները հոգեբանական կերպարներ են, որոնց միջոցով նա կարողանում է ներկայացնել մարդկային փոխհարաբերությունները` լավ ու վատ դրսևորումներով, ինչպես նաև արտահայտում է իր հումանիստական սկզբունքները: Դեմիրճյանը ստեղծագործել է գրական բոլոր ժանրերով, սակայն ավելի ճանաչված է արձակ գործերով և դրամատուրգիայով: Գիրքը լույս է ընծայել «Էդիթ Պրինտ»-ը։
Թարգմանական գրականություն
Նիկոս Խրիսոս, «Նոր օր»
Դեկտեմբերյան մի գիշեր նավահանգստի մութ անկյուններից մեկում երեք տղամարդ ողջ-ողջ այրում են Սեբաստիանին, որը թափառական գուշակի համբավ ուներ... Երեք հանցագործների մեջ ամենաերիտասարդ անձը՝ Պողոսը, իրենց հանցանքի դաժանությունից ցնցված, սկսում է զոհի մասին տեղեկություններ փնտրել։ Նա հույս ունի, որ այդ կերպ կքավի իր մեղքը, եւ հավատում է, որ սպանվածի կենսագրությունն ի մի բերելով՝ կվերակենդանացնի նաեւ նրան։ Պողոսը գտնում է Սեբաստիանի հիմնական ուղեկիցներին եւ խնդրում պատմել իրենց առաջնորդի մասին... Ամեն մեկն ունի իր պատմությունն ու գաղտնիքները, յուրաքանչյուրի պատմության մեջ մի մութ անկյուն է մնում, ու Սեբաստիանի կերպարն ավելի միֆական է դառնում։ Թարգմանիչ՝ Շուշան Մարուքի։ Գիրքը լույս է ընծայել Newmag-ը։
Փաստավավերագրական գրականություն
Հակոբ Նիկողոսյան, «Բուժում»
Հակոբ Նիկողոսյանի «Բուժում» գրքում առաջարկվում է ավելի քան 180 տեսակի հիվանդությունների բուժման համար 700-ից ավելի դեղատոմսեր՝ բնամթերքներով և դեղաբույսերով:
Տարատեսակ հիվանդությունների բուժման համար հեղինակը ներկայացրել է նաև այլընտրանքային բուժման միջոցներ, օրինակ, ծառերի, քարերի, կենդանիների արյան, հյութաբուժության, լոգանքների միջոցով: Գիրքը նախատեսված է բոլոր նրանց համար, ովքեր ցանկանում են լինել առողջ։ Հեղ․հրատարակություն։
«Նոր գիրք»-ը ներկայացրեց Ռոզա Գրիգորյանը