Ադրբեջանական ուժերի հետ մարտի ժամանակ զոհվել է ԼՂ Մարտունի քաղաքի քաղաքապետը
1 րոպեի ընթերցում
![Ադրբեջանական ուժերի հետ մարտի ժամանակ զոհվել է ԼՂ Մարտունի քաղաքի քաղաքապետը](http://armenpress.am/resized/480/static/news/b/2023/09/1120008.jpg)
ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ։ Լեռնային Ղարաբաղի դեմ Ադրբեջանի ռազմական ագրեսիայի հետևանքով զոհվել է ԼՂ-ի Մարտունի քաղաքի քաղաքապետ Ազնավուր Սաղյանը։ Ինչպես տեղեկացնում է «Արմենպրես»-ը, այս մասին X-ի իր միկրոբլոգում գրել է ԼՂ նախկին պետնախարար Արտակ Բեգլարյանը:
«ԼՂ-ի Մարտունու քաղաքապետ Ազնավուր Սաղյանն այսօր ընկել է ադրբեջանական ցեղասպան ուժերի հետ մարտում՝ պաշտպանելով իր հայրենիքը։ Անձամբ ճանաչում էի նրան: Նա խիզախ, ազնիվ ու նվիրյալ հայ էր, ով միշտ եղել է բոլոր մարտերի առաջնագծում»,- գրել է Բեգլարյանը: