Կարեն Գիլոյանը տպավորված է ԱՊՀ խաղերի մակարդակով

ՄԻՆՍԿ, 8 ՕԳՈՍՏՈՍԻ, ԱՐՄԵՆՊՐԵՍ: Հայաստանի Հանրապետության կրթության, գիտության, մշակույթի և սպորտի նախարարի տեղակալ Կարեն Գիլոյանը ԱՊՀ երկրորդ խաղերը հաջողված է համարում:

«Արմենպրես»-ի թղթակցի հետ զրույցում Կարեն Գիլոյանը կիսվեց խաղերից ունեցած տպավորություններով և նշեց՝ ի տարբերություն առաջին խաղերի, որոնք կայացել են Կազանում, Բելառուսում ընթացող խաղերը կայացած կարելի է համարել:

«ԱՊՀ առաջին խաղերն անցկացվեցին Կազանում, իսկ երկրորդ խաղերն այս օրերին ընթանում են Բելառուսում։ Այստեղ շատ ավելի ուժեղ կազմ է հավաքված: Բացի ԱՊՀ երկրներից, մասնակցում են նաև մի քանի այլ երկրների թիմեր, որոնք հետաքրքիր կազմերով են մասնակցում»,-ասաց Գիլոյանը:

Վերջինիս խոսքով` մրցաշարի բարձր մակարդակի մասին խոսում են, օրինակի համար, հրաձգության մրցաշարի արդյունքները, որտեղ, Գիլոյանի խոսքով, գրանցվում են աշխարհի առաջնության մակարդակի միավորներ:

Բելառուսի Հանրապետությունում անցկացվում են ԱՊՀ 2-րդ խաղերը, որին Հայաստանը մասնակցում է մեծաքանակ պատվիրակությամբ: 140-ից ավելի պատանի և երիտասարդ մարզիկներ Հայաստանի մարզական պատիվը կպաշտպանեն բռնցքամարտ, ազատ և հունահռոմեական ոճի ըմբշամարտ, ձյուդո, կարատե, աթլետիկա, լող, ծովափնյա վոլեյբոլ, սամբո, նետաձգություն, հրաձգություն, խոտի հոկեյ, մարմնամարզություն և վոլեյբոլ մարզաձևերում: ԱՊՀ 2-րդ խաղերը անցկացվում են Բելառուսի տարբեր շրջանների 10 քաղաքներում։ Նոր ձևաչափի նպատակն է ընդլայնել մրցաշարի աշխարհագրությունը և սպորտի մասսայականացումը երկրի տարբեր հատվածներում: Մասնավորապես, մրցումներն անցկացվում են Մինսկ, Բորիսով, Բրեստ, Վիտեբսկ, Գոմել, Գրոդնո, Ժլոբին, Մոգիլյով, Մոլոդեչնո, Օրշա և Սոլիգորսկ քաղաքներում։ 23 երկրի շուրջ 5 հազար մարզիկներ իրենց ուժերը կչափեն ընդհանուր առմամբ 20 մարզաձևում: Խաղերի փակման արարողությունը նախատեսված է օգոստոսի 13-ին: