Ադրբեջանը ցանկանում է հրաժարվել Նոյեմբերի 9-ի եռակողմ հայտարարությունից ու շարունակել պատերազմը․ Արցախի նախագահ
3 րոպեի ընթերցում
ԵՐԵՎԱՆ, 7 ՕԳՈՍՏՈՍԻ, ԱՐՄԵՆՊՐԵՍ։ Արցախի Հանրապետության նախագահ Արայիկ Հարությունյանն այն կարծիքին է, որ Ադրբեջանը ցանկանում է հրաժարվել 2020 թվականի նոյեմբերի 9-ին Հայաստանի, Ռուսաստանի և Ադրբեջանի ղեկավարների ստորագրած եռակողմ հայտարարությունից և շարունակել պատերազմը։
Արցախի նախագահն այս մասին ասել է Արցախի Հանրային հեռուստաընկերությանը տված հարցազրույցում։
Արայիկ Հարությունյանը նշել է, որ Ադրբեջանը, օգտվելով Ուկրաինայի հետ պատերազմի մեջ գտնվող Ռուսաստանի վիճակից, փորձել է ստիպել Արցախին հրաժարվել Նոյեմբերի 9-ի հայտարարությամբ նրան տրված իրավունքներից և երկխոսության գնալ իր առաջարկած օրակարգով։
«Ադրբեջանն ուզում է հրաժարվել եռակողմ հայտարարությունից և շարունակել պատերազմը։ Սա արդեն պատերազմ է, սա պատերազմի շարունակությունն է, որի նպատակն է պաշարման միջոցով Լեռնային Ղարաբաղը դարձնել համակենտրոնացման ճամբար, իսկ հետո իրականացնել ցեղասպանություն»,- հայտարարել է Հարությունյանը։
Արցախի նախագահի խոսքով՝ Լեռնային Ղարաբաղում Ադրբեջանի ցեղասպանական քաղաքականության նպատակներից մեկը նաև Հայաստանի վրա ճնշում գործադրելն է՝ Սյունիքով ճանապարհի առավել արտոնյալ պայմաններ ունենալու համար։
Հարությունյանը մեջբերեց 2021 թվականի դեկտեմբերին Բրյուսելում Հայաստանի վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի եռակողմ հանդիպումից առաջ Ադրբեջանի նախագահի հայտարարությունը, որ «Զանգեզուրի միջանցքը պետք է աշխատի Լաչինի միջանցքի տրամաբանության շրջանակներում»։
«Իհարկե, մենք սկզբնական շրջանում դրան ուշադրություն չէինք դարձնում, մտածում էինք, որ դա հայտարարություն է Հայաստանի իշխանությունների վրա ճնշում գործադրելու համար, սակայն հետագայում Ադրբեջանը իր վարած քաղաքականության մեջ դա կարևորում էր։ Կարող եմ նաև այսօր հայտարարել, որ Ադրբեջանը շարունակում է իր ճնշումները առավելագույնը կորզելու համար։ Մենք պետք է ֆիքսենք, որ Ադրբեջանը Լեռնային Ղարաբաղի հայերին ինչ-որ առումով պատանդի կարգավիճակում պահելու և զուգահեռաբար ցեղասպանություն իրականացնելու ցանկություն ունի՝ ճնշում գործադրելով Հայաստանի վրա Զանգեզուրի ճանապարհի առավել արտոնյալ տարբերակ ունենալու առումով»,- հայտարարել է Արայիկ Հարությունյանը։