1 րոպեի ընթերցում
ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ: Հայաստանի ազգային ժողովի նախագահ Ալեն Սիմոնյանը հաջորդ շաբաթ պաշտոնական այցով կմեկնի Լեհաստան:
«Արմենպրես»-ի փոխանցմամբ՝ այս մասին հայտնեց Լեհաստանում Հայաստանի Հանրապետության դեսպան Սամվել Մկրտչյանը հայ-լեհական տնտեսական համագործակցության միջկառավարական հանձնաժողովի 7-րդ նիստի շրջանակում:
«Հայաստանի և Լեհաստանի միջև քաղաքական երկխոսությունը գտնվում է բարձր մակարդակի վրա: Անցած տարի կրկին որոշ դադարից հետո կայացավ ՀՀ արտգործնախարարի այցը Լեհաստան: Եվ հաջորդ շաբաթ կկայանա Հայաստանի ԱԺ նախագահ Ալեն Սիմոնյանի պաշտոնական այցը Լեհաստան»,-ասաց դեսպանը:
Դեսպանը շատ կարևորեց, որ բարձր մակարդակի վրա գտնվող քաղաքական երկխոսության շրջանակները, բովանդակությունը համալրվի նաև տնտեսական և առևտրային հարաբերությունների զարգացմամբ:
Նա ընդգծեց՝ Հայաստանի և Լեհաստանի հարաբերությունները կարևոր են ոչ միայն երկկողմ, այլ նաև Հայաստան-ԵՄ հարաբերությունների ենթատեքստում:
«Եվ գոհունակությամբ պետք է արձանագրեմ, որ պարբերաբար ստանում ենք Լեհաստանի աջակցությունը նաև Հայաստան-ԵՄ օրակարգային խնդիրների շրջանակում»,-նշեց Մկրտչյանը: