Հայաստանի Հանրապետությունում աշխատավարձը շարունակական բարձրանում է․ վարչապետ

ԵՐԵՎԱՆ, 22 ՀՈՒՆԻՍԻ, ԱՐՄԵՆՊՐԵՍ։ Հայաստանում աշխատավարձի ֆոնդի շոշափելի աճ է արձանագրվել։ «Արմենպրես»-ի հաղորդմամբ՝ Կառավարության հունիսի 22-ի նիստի ժամանակ այս մասին ասաց վարչապետ Նիկոլ Փաշինյանը՝ ներկայացնելով վիճակագրական վերջին տվյալները։

«2018 թվականի մայիսի համեմատ 2023 թվականի մայիսին Հայաստանի Հանրապետությունում աշխատանքային ֆոնդը կրկնապատկվել է՝ ավելանալով 106,6 տոկոս կամ 103 միլիարդ 40 միլիոն դրամով։ Այսինքն՝ այսօր Հայաստանի Հանրապետությունում աշխատող մարդիկ 103 միլիարդ 40 միլիոն դրամով ավել աշխատավարձ են ստանում, քան 2018 թվականի մայիսին։

Շատ կարևոր է նաև միջին աշխատավարձի ցուցանիշը։ Հայաստանի Հանրապետությունում մեկ մարդու միջին աշխատավարձը 2018 թվականի մայիսի համեմատ ավելացել է 101 հազար 629 դրամով կամ 57,6 տոկոսով, իսկ նախորդ տարվա մայիսի համեմատ 40 հազար 323 դրամ կամ 17 տոկոսով։ Հայաստանի Հանրապետությունում աշխատավարձը շարունակական բարձրանում է։

2022 տվյալներով գնաճի էֆեկտը հանած՝ 6.3 տոկոսով Հայաստանում աշխատավարձը բարձրացել է»,- ընդգծեց վարչապետը։

Վարչապետն աշխատավարձի ֆոնդի բարձրացումը համարում է Կառավարության կողմից իրականացված բարեփոխումների արդյունքը։