2 րոպեի ընթերցում
ԵՐԵՎԱՆ, 17 ՄԱՅԻՍԻ, ԱՐՄԵՆՊՐԵՍ: ՀՀ ոստիկանությունը հաղորդում է ստացել ՀՀ վարչապետ Նիկոլ Փաշինյանի որդուն՝ Աշոտ Փաշինյանին առևանգելու փորձի մասին:
Լրատվամիջոցներից մեկում հայտնված հրապարակումից հետո «Արմենպրես»-ը առևանգման փորձի մասին տեղեկատվությունը փորձեց ճշտել ՀՀ ոստիկանությունից:
«Այդ բովանդակությամբ հաղորդում Ոստիկանությունում ստացվել է: Կազմված փաստաթղթերը կուղարկվեն Քննչական կոմիտե»,-ասացին Ոստիկանությունից:
Ավելի վաղ «Հայկական ժամանակ»-ը գրել էր, որ ժամը 15:00-ի սահմաններում վարչապետ Նիկոլ Փաշինյանի որդուն՝ Աշոտ Փաշինյանին, իր տան մերձակայքից փորձել են առևանգել:
«Հայկական ժամանակ»-ը գրել էր, որ նախնական տեղեկություններով՝ առևանգման մասնակիցները «Որդիների կանչ» ՀԿ անդամներն են, «ովքեր ստիպել են Աշոտ Փաշինյանին նստել իրենց մեքենան, սակայն մի պահ կանգ առած մեքենայից Աշոտ Փաշինյանին հաջողվել է դուրս թռչել, որի հետևանքով նրան վրաերթի է ենթարկել նույն կազմակերպության անդամների հետևից ընթացող մեքենան: Արդյունքում վնասվել է Աշոտ Փաշինյանի ոտքը, իսկ դեպքի վայրից «Որդիների կանչ» հասարակական կազմակերպության անդամները դիմել են փախուստի: Աշոտ Փաշինյանը դիմել է իրավապահներին»: