Լեռնանիստ համայնքին կից հիմնվող նորատունկ անտառում տնկվել են 1000-ից ավելի սոճու և կեչու բուսակներ
1 րոպեի ընթերցում
ԵՐԵՎԱՆ, 26 ԱՊՐԻԼԻ, ԱՐՄԵՆՊՐԵՍ: Սինոփսիս Արմենիայի՝շուրջ 120 կամավորներ,«Էյ Թի Փի»բարեգործական հիմնադրամի աշխատակիցների աջակցությամբ, ապրիլի 24-ին Լեռնանիստ համայնքին կից հիմնվող նորատունկ անտառում տնկել են հազարից ավելի սոճու և կեչու բուսակներ: «Արմենպրես»-ի փոխանցմամբ՝ կամավորական միջոցառմանն ընկերության աշխատակիցները եկել էին իրենց երեխաների հետ՝ փորձելով դեր մանկուց նրանց մեջ սերմանել կամավորության և հարազատ երկրի ապագայի համար պատասխանատվության զգացում։
Միջոցառման խորհուրդն էր՝ երկրի առաջընթացի գործում ներդրումներ կատարելու միջոցով ոգեկոչել Հայոց ցեղասպանության զոհերի հիշատակը:
«Ծառ տնկելով՝ ևս մեկ անգամ վկայում ենք, որ մենք ենք այս երկրի տերը: Այս տարվա ծառատունկը առավել քան խորհրդանշական է և նվիրվում է Ցեղասպանության զոհերի հիշատակը վառ պահելուն: - ասել է «Էյ Թի Փի» բարեգործական հիմնադրամի գրասենյակի համակարգող Ռուզաննա Առուստամյանը՝ շնորհակալության խոսք հղելով նաև Սինոփսիս Արմենիայի թիմին՝ տարիներ շարունակ երկրի շրջակա միջավայրի պահպանության և կանաչապատման աշխատանքներում իրենց սատարելու համար։