ԱԺ-ն Կոռուպցիայի կանխարգելման հանձնաժողովի անդամի պաշտոնում քննարկում է Արամայիս Փաշինյանի թեկնածության հարցը
2 րոպեի ընթերցում
ԵՐԵՎԱՆ, 12 ԱՊՐԻԼԻ, ԱՐՄԵՆՊՐԵՍ: ՀՀ ազգային ժողովի Կոռուպցիայի կանխարգելման հանձնաժողովի անդամի թափուր պաշտոնում քննարկվում է Արամայիս Փաշինյանի թեկնածության հարցը:
«Արմենպրես»-ի հաղորդմամբ՝ ԱԺ փոխնախագահ Ռուբեն Ռուբինյանը հայտարարեց, որ մրցութային խորհրդի որոշմամբ՝ Կոռուպցիայի կանխարգելման հանձնաժողովի անդամի թափուր պաշտոնում առաջադրվել է Արամայիս Փաշինյանի թեկնածությունը:
Մրցութային խորհրդի անդամ Արուսյակ Ջուլհակյանը ներկայացրեց թեկնածուին:
Արամայիս Փաշինյանը հաշվապահ-աուդիտոր է, ունի մոտ 20 տարվա մասնագիտական աշխատանքային փորձ:
Իր ելույթում Փաշինյանն ասաց. «Ակնհայտ է, որ կոռուպցիայի կանխարգելման տեսանկյունից որքան էլ կարևոր լինի աշխատավարձերի բարձրացումը, ոլորտ բարեվարք հանրային ծառայողների ներգրավումը կամ հանցագործողությունների դեպքում պատժի անխուսափելիությունը, անհրաժեշտ է հնարավորինս փակել կոռուպցիոն գայթակղությունների դռները՝ այդպիսով կանխարգելելով հնարավոր կոռուպցիոն երևույթները»:
Ըստ նրա՝ դա հնարավոր է անել համապատասխանության գնահատման միջազգային չափորոշիչների ներդրման, ներքին վերահսկողության համակարգերի կատարելագործմամբ, ներքին աուդիտի ինստիտուտի զարգացմամբ, թվային գործիքների ներդրմամբ, օրենսդրական խութերի վերացմամբ և այլն: