Հայաստանում կարմրուկի դեպքերի տարածման հետևանքով դպրոցներն և մանկապարտեզները փակելու անհրաժեշտություն դեռևս չկա. Ավանեսյան

ԵՐԵՎԱՆ, 6 ՄԱՐՏԻ, ԱՐՄԵՆՊՐԵՍ: Կարմրուկի կանխարգելման ամենագործուն միջոցը պատվաստումն է:

«Արմենպրես»-ի հաղորդմամբ՝ այս մասին այսօր հրավիրված ասուլիսի ընթացքում ասաց ՀՀ առողջապահության նախարար Անահիտ Ավանեսյանը:

«Ազգային օրացույցով սահմանված է իրականացնել պատվաստում 2 դեղաչափով, առաջինը՝ 1 տարեկան երեխաներին, երկրորդ դեղաչափն իրականացվում է 4-6 տարեկանում: Երկու դեղաչափով պատվաստված լինելու պարագայում վարակման հավանականությունը գրեթե բացառվում է: Առանձնահատուկ հորդորում ենք այն ընտանիքներին, որտեղ կան պատվաստման տարիքին հասած երեխաներ, անպայման պատվաստվեն, որովհետև դրանով նրանք պաշտպանում են նաև իրենց փոքր քույրիկ-եղբայրներին»,- ասաց Ավանեսյանը:

Անդրադառնալով մեծահասակների ռիսկային լինելու հարցին, նախարարն ընդգծեց, որ պատվաստումները պատշաճ ստացած մեծահասակները հավելյալ պատվաստվելու կարիք չունեն: «Եթե քաղաքացին անկախ տարիքից ունի փաստաթուղթ, որը հավաստում է երկու դեղաչափի կիրառումը, ապա զգուշանալու կարիք ընդհանրապես չկա»,-ասաց նախարարը:

Նա հայտնեց, որ պացիենտների մեծ մասը Երևանից են:

Անդրադառնալով երկրում ստեղծված համաճարակաբանական իրավիճակին՝ Ավանեսյանը նշեց. «2022 թվականից սկսած մեր տարածաշրջանում, նաև այլ տարածաշրջաններում կարմրուկով պայմանավորված իրավիճակը բավականին աշխույժ է: Վերջին ստացվող տեղեկատվությունների համաձայն՝ ակնկալում էինք, որ պետք է ներթափանցում լինի նաև ՀՀ»,- ասաց նախախարը:

Դպրոցների և մանկապարտեզների փակման հարցին նախարարը պատասխանեց, որ այս պահին այդ միջոցառման կարիքը չկա: «Եթե մոնիտորինգը ցույց տա, որ մենք ունենք թվերի աճ, իրավիճակի լարում և համաճարակաբանական իրավիճակը մեզ թելադրի, որ դրա կարիքը կա, մենք այն կիրականացնենք»,- ասաց Ավանեսյանը: