2 րոպեի ընթերցում
ԵՐԵՎԱՆ, 12 ՀՈՒՆՎԱՐԻ, ԱՐՄԵՆՊՐԵՍ: Արցախի պետնախարար Ռուբեն Վարդանյանը Ադրբեջանի կողմից Լաչինի միջանցքի արգելափակման պայմաններում թե Հայաստանից, թե սփյուռքից ավելի շատ քայլերի, ավելի շատ ուղղություններով աջակցության անհրաժեշտություն է տեսնում:
«Արմենպրես»-ի փոխանցմամբ՝ Վարդանյանն այս մասին ասաց «Շրջափակման մեկ ամիս» խորագրով Երևան-Ստեփանակերտ տեսակամուրջի ընթացքում՝ անդրադառնալով հարցին, թե կոնկրետ ի՞նչ ակնկալիքներ կան Հայաստանից:
Վարդանյանի կարծիքով՝ մարդիկ 100 տոկոսով չեն հասկանում, թե ինչ է շրջափակումը: Ըստ նրա՝ Հայաստանի ՀԿ-ները կարող են դիմել միջազգային տարբեր կառույցների՝ նշելով Ադրբեջանի կողմից մարդու իրավունքների և այլ տարաբնույթ խախտումների մասին: Ըստ նրա՝ արձագանքը թե ՀԿ-ներից, թե պետական մարմիններից, թե ԱԺ-ից պետք է ավելի բարձր հնչեր, քանի որ աշխարհում շատ դժվար է ձայնը լսելի դարձնել:
«Եվ հայկական սփյուռքը, և Հայաստանը պետք է հասկանան, որ սա նորմալ իրավիճակ չէ, սա իրավիճակ է, որը պահանջում է արտահերթ քայլեր և ավելի ուժեղ ձևով է պետք հնչեցնել այս ամենը»,-ասաց Վարդանյանը:
Իսկ, թե ի՞նչ ակնկալիք կա Հայաստանի իշխանությունից՝ Արցախի պետնախարարն ասաց. «Հայաստանի իշխանությունն իր դիրքորոշումն արդեն հայտարարել է։ Իրենք աջակցում են ֆինանսապես, իրավական ուղղությամբ և ասում են, որ այսքանը կարող են անել, ավելին անել չեն կարող։ Կապ չունի, թե մենք ինչ ենք սպասում, իրենք իրենց պատասխանը տվել են, որ կարող են այսքանն անել։ Մենք շնորհակալ ենք դրա համար, ուղղակի այս իրավիճակում մեզ պետք է ավելի շատ ուղղությամբ օգնություն»: