Ոլորտի պատասխանատուն մանրամասնել է, թե ինչ պարենային ապրանքատեսակների և դեղերի կարիք ունի Արցախը

ՍՏԵՓԱՆԱԿԵՐՏ, 5 ՀՈՒՆՎԱՐԻ, ԱՐՄԵՆՊՐԵՍ: Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովը մի շարք լայն սպառման ապրանքատեսակների, դեղորայքի, մանկական կերերի և տակդիրների իրացման գների արհեստական բարձրացումները բացառելու նպատակով Ստեփանակերտում գործող առևտրային օբյեկտներում և դեղատներում շարունակում է իրականացնել ամենօրյա ռեժիմով դիտարկումներ:

Այս մասին «Արմենպրես»-ի թղթակցի հետ զրույցում տեղեկացրեց հանրային ծառայությունները և տնտեսական մրցակցությունը կարգավորող պետական հանձնաժողովի Տնտեսական մրցակցության պաշտպանության վարչության պետ Հրաչ Ավթանդիլյանը: «Օպերատիվ շտաբի հանձնարարությամբ նմանատիպ դիտարկումներ իրականացվում են նաև Ասկերան, Մարտունի ու Մարտակերտ շրջկենտրոններում և կատարված դիտարկումների արդյունքները տրամադրվում են Հանձնաժողովին: Ստեփանակերտի և շրջկենտրոնների դիտարկված առևտրային օբյեկտներում արդեն չեն իրացվում հետևյալ ապրանքատեսակները՝ շաքարավազ, հնդկաձավար, ոսպ, մակարոնեղեն, բրինձ, ոլոռ, ձավար, երշիկ, նրբերշիկ, սուրճ, ծխախոտ, ձկնեղեն, բանջարեղեն և մրգեր: Նկատվում է ալյուրի, աղի, ձեթի, ձվի, տեղական հավի մսի, կաթնամթերքի, պանրի և կարագի, ինչպես նաև լվացքի փոշու, օճառի, լուցկու և զուգարանի թղթի պակաս»,-մանրամասնեց Վարչության պետը՝ հավելելով, որ ըստ դեղատներում պարբերաբար իրականացվող մոնիթորինգի արդյունքների՝ Արցախում կա ճնշման, ջերմիջեցնող, ցավազրկող, ստամոքս-աղիքային, հանգստացնող, հակաբիոտիկ և շաքարային դիաբետով տառապող անձանց համար անհրաժեշտ դեղորայքի, ինչպես նաև մանկական տակդիրների ու կերերի պակաս:

«Բնակչության առաջնային կարիքների ապահովման համար, օպերատիվ շտաբի կողմից սահմանված կարգով պահուստային ֆոնդից առևտրային օբյեկտներին սահմանափակ քանակությամբ որոշ ապրանքատեսակներ են մատակարարվում՝ կարևորելով դրանց համաչափ տեղաբաշխումը»,-ասաց Հրաչ Ավթանդիլյանը՝ ընդգծելով, որ հանձնաժողովն իր լիազորությունների շրջանակներում օպերատիվ կերպով արձագանքում է քաղաքացիների կողմից հնչած բոլոր հարցումներին, բողոքներին, իսկ իրականացված դիտարկումների արդյունքները հրապարակվում են Հանձնաժողովի պաշտոնական կայքէջում և ֆեյսբուքյան էջում՝ հանրության տեղեկացվածությունն ապահովելու նպատակով:

Վան Նովիկով