2 րոպեի ընթերցում
ԵՐԵՎԱՆ, 7 ԴԵԿՏԵՄԲԵՐԻ, ԱՐՄԵՆՊՐԵՍ: Ֆուտբոլի աշխարհի առաջնության 1/8 եզրափակիչ փուլի վերջին խաղում Պորտուգալիայի ազգային ընտրանին մրցեց Շվեյցարիայի հավաքականի դեմ:
«Արմենպրես»-ի հաղորդմամբ` Ալ-Դայեն քաղաքի «Լուսաիլ» մարզադաշտում կայացած խաղի մեկնարկային րոպեներին երկու թիմերը հավասարապես փոխանակվում էին գրոհներով, սակայն ավելի հաջողակ գտնվեցին պորտուգալացիները։ 17-րդ րոպեին սուր անկյունից կատարած հրաշալի հարվածով հաշիվը բացեց Գոնսալո Ռամուշը: Խաղի 33-րդ րոպեին Պորտուգալիան օգտագործեց նաև ստանդարտ դիրքը և կրկնապատկեց հաշվի տարբերությունը: Անկյունայինի խաղարկումից հետո գլխի հարվածով աչքի ընկավ Պեպեն:
Շվեյցարիան մրցակցին ոչինչ չէր կարողանում առաջարկել: Առաջին կեսն ավարտվեց պորտուգալացիների առավելությամբ՝ 2-0 հաշվով, իսկ
երկրորդ կեսի մեկնարկում նրանք բաց չթողեցին հաշիվը եռապատկելու հնարավորությունը: Դուբլի հեղինակ դարձավ Գոնսալո Ռամուշը:
Պորտուգալիան քարը քարին չթողեց Շվեյցարիայի պաշտպանությունից և շատ արագ խփեց նաև 4-րդ գնդակը: Դիպուկ հարվածով աչքի ընկավ Ռաֆայել Գերեյրուն: Շվեյցարիան հեղինակության գնդակը խփեց անկյունայինի խաղարկումից հետո: Գոլն իր ակտիվում գրանցեց Մանուել Ականջին:
Սակայն պորտուգալացիները շատ արագ փշրեցին շվեյցարացիների փոքրիկ հույսն անգամ․ Գոնսալո Ռամուշը բաց չթողեց իր հնարավորությունը 67-րդ րոպեին` դառնալով հեթ-տրիկի հեղինակ: Գոնսալու Ռամուշը դարձավ Մունդիալ-2022-ում հեթ-տրիկ ձևակերպած առաջին ֆուտբոլիստը։
Հանդիպման ավելացված ժամանակում էլ իր թիմի 6-րդ գոլը խփեց Ռաֆաել Լեաուն:
Պորտուգալիայի հավաքականի ավագ Կրիշտիանու Ռոնալդուն ընդգրկված չէր թիմի մեկնարկային կազմում և փոխարինման մտավ 73-րդ րոպեին։ Նա նաև գոլի հեղինակ դարձավ, սակայն գոլը չարձանագրվեց, քանի որ պորտուգալացի հարձակվողը խաղից դուրս վիճակում էր։
Պորտուգալիա-Շվեյցարիա` 6:1:
Քառորդ եզրափակիչում Պորտուգալիան կխաղա Մարոկկոյի դեմ: Այդ հանդիպումը կկայանա դեկտեմբերի 10-ին: