«Աշխատանքային էլեկտրոնային բորսա» ծրագիրն օր առաջ կաջակցի զբաղվածության ոլորտի աշխուժացմանը
2 րոպեի ընթերցում
ԵՐԵՎԱՆ, 18 ՆՈՅԵՄԲԵՐԻ, ԱՐՄԵՆՊՐԵՍ: Աշխատանքի և սոցիալական հարցերի նախարարության «Նորք» տեխնոլոգիաների կենտրոնը աշխատանքի ու զբաղվածության ոլորտի ծրագրերն առավել արդյունավետ իրականացնելու նպատակով առաջիկայում կկիրարկի «Աշխատանքային էլեկտրոնային բորսա» ծրագիրը:
«Արմենպրես»-ի մամուլի սրահում ՀՀ աշխատանքի և սոցիալական հարցերի նախարարության «Նորք» տեխնոլոգիաների կենտրոնի տնօրեն Անահիտ Պարզյանն ասաց, որ հարթակը հնարավորություն կտա քաղաքացուն ձևավորել անհատական ինքնակենսագրական:
«Գործատուները հաճախ պահանջում են հիմնավորել ինքնակենսագրականներում առկա տեղեկատվությունը: Հարթակի կիրարկման փոխգործելիության պարագայում քաղաքացին կարող է այլևս իր հետ չտանել ինքնակենսագրականը, կամ, օրինակ, անձը հաստատող փաստաթղթի պատճենը»,-ասաց նա՝ հավելելով, որ, կախված ձևավորած պրոֆիլից, քաղաքացուն պարբերաբար առաջարկություններ կգան մասնակցելու այս կամ այն զբաղվածության ծրագրին, կառաջարկվի շուկայում իրեն հարմար աշխատանք:
Պարզյանը նշեց, որ հարթակի կիրարկումն օր առաջ կաջակցի զբաղվածության ոլորտի աշխուժացմանը: Պահանջներին համապատասխան ծրագիրը պարբերաբար կթարմացվի:
«Այս ծագրի վերջնաժամկետը 2023 թվականի դեկտեմբերն է: Մենք արդեն սկսել ենք առաջին մրցույթը: Հետագայում ևս երեք մրցույթներ կանցկացվեն»,-ասաց նա:
Անդրադառնալով արհեսատական բանականության ծրագրին, որը վերջերս է կիրարկվել, Պարզյանն ասաց, որ դա նորարարություն է ոլորտում:
«Մենք սա կիրարկում ենք սոցիալական ոլորտի աշխատողների համար, որպեսզի նրանք սուբյեկտիվ վելուծություն կամ գնահատականներ չկարողանան ձևավորել և հակառակը՝ ստանան աջակցություն համակարգի կողմից` այս կամ այն որոշումը կայացնելիս»,-ասաց բանախոսը՝ ընդգծելով, որ գործիքը բավական օգտակար է սոցիալական ոլորտի աշխատակիցների համար: