Խնդիրը, ցավոք, մինչև օրս չի լուծվել. Փաշինյանը՝ վճարված 100 միլիոնավոր դոլարների դիմաց ՀՀ-ին զենք չմատակարարելու մասին
2 րոպեի ընթերցում
ԵՐԵՎԱՆ, 11 ՆՈՅԵՄԲԵՐԻ, ԱՐՄԵՆՊՐԵՍ: Հայաստանն աշխատում է սպառազինության և տեխնիկայի ձեռք բերման հնարավորությունները դիվերսիֆիկացնելու ուղղությամբ: «Արմենպրես»-ի հաղորդմամբ՝ այս մասին ասաց ՀՀ վարչապետը Նիկոլ Փաշինյանը «Հանրային հեռուստաընկերությանը» տված հարցազրույցում:
Լրագրողը հիշեցրեց մամուլում՝ հնդկական զենքի մատակարարումների վերաբերյալ հրապարակումների մասին: Փաշինյանն ասաց.
«Մենք այսօր փորձում ենք, աշխատում ենք սպառազինության և տեխնիկայի ձեռք բերման մեր հնարավորությունները դիվերսիֆիկացնել և այդ ուղղությամբ գնալու ենք առաջ»:
Վարչապետը վստահեցրեց, որ եթե որևէ արդյունքի մասին հայտարարելու անհրաժեշտություն կամ նպատակահարմարություն լինի, կառավարությունը դա կանի:
Վարչապետն ավելի վաղ հայտարարել էր, որ 100 միլիոնավոր դոլարներ վճարված են, բայց զենքի մատակարարումները Հայաստանին չեն արվում, այդ թվում դաշնակից երկրների կողմից: Անդրադառնալով հարցին, թե արդյոք լուծվել է այդ խնդիրը՝ Փաշինյանը պատասխանեց. «Մեր քննարկումները շարունակվում են: Ոչ, ցավոք, մինչև օրս չի լուծվել: Բայց քննարկումներն ընթացքի մեջ են»:
Լրագրողի դիտարկմանը, որ մամուլում խոսվում էր Հորդանանի մասին, Փաշինյանը պատասխանեց. «Մամուլը, ինչպես միշտ, շատ ավելի հավաստի տեղեկություններ ունի»: