Տեղահանված քաղաքացիների ընտրական իրավունքի իրագործման համար Արցախում գործուն մեխանիզմներ կմշակվեն
2 րոպեի ընթերցում
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Արցախի բռնազավթված տարածքներից տեղահանված քաղաքացիների ընտրական իրավունքի իրագործմանն ուղղված համապատասխան արդյունավետ գործիքակազմ ապահովելու նպատակով օրենսդրական փոփոխություններ են նախատեսվում:
Այս մասին «Արմենպրես»-ի թղթակցի հետ զրույցում տեղեկացրել է Արցախի արդարադատության նախարարության աշխատակազմի օրենսդրական հարցերի վարչության պետ Եվգենյա Հակոբյանը՝ հավելելով, որ Ազգային ժողովն արդեն քննարկել և ընդունել է «Արցախի Հանրապետության բռնազավթված տարածքների մասին» օրենքում փոփոխություն կատարելու մասին օրինագիծ, ըստ որի՝ Արցախի Հանրապետության տեղահանված քաղաքացիների ընտրական իրավունքի իրականացման կիրառումն ապահովող օրենսդրական փոփոխությունների իրականացման ժամկետը երկարաձգվել է և ընթացիկ տարվա հոկտեմբերի 1-ի փոխարեն վերջնաժամկետ է սահմանվել 2023 թվականի փետրվարի 1-ը:
«Հաշվի առնելով նշված խումբ քաղաքացիների ընտրական իրավունքի իրագործման առնչությամբ գործնականում ծագող խնդիրները, ընտրություններին ու հանրաքվեներին նրանց մասնակցության համար արդյունավետ և գործուն մեխանիզմներ մշակելու նպատակով՝ անհրաժեշտություն է առաջացել օրենսդրական փոփոխությունների իրականացման ժամկետը երկարաձգել: Մինչև նշված ժամկետի ավարտը պատկան մարմինների կողմից կկատարվեն ավելի խորը և բազմակողմանի ուսումնասիրություններ, որոնք հիմք կհանդիսանան խնդրի կարգավորման արդյունավետ մեխանիզմներ մշակելու համար»,-մանրամասնեց վարչության պետը՝ հավելելով, որ Ընտրական օրենսգրքի փոփոխությունների աշխատանքային տարբերակն արդեն շրջանառության մեջ է: