Հայաստանի ներդրումը՝ միջազգային խաղաղությանը. Հաագայի Խաղաղության պալատի բակում հայկական խաչքար տեղադրվեց
3 րոպեի ընթերցում
ՀԱԱԳԱ, 11 ՄԱՅԻՍԻ, ԱՐՄԵՆՊՐԵՍ: Հաագայի Խաղաղության պալատի բակում տեղի ունեցավ հայկական խաչքարի բացման արարողությունը: «Արմենպրես»-ի թղթակցի հաղորդմամբ՝ բացումն արեց պաշտոնական այցով Նիդերլանդներում գտնվող ՀՀ վարչապետ Նիկոլ Փաշինյանը:
Խաչքարը խորհրդանշում է Հայաստանի ներդրումը միջազգային խաղաղությանը:Այն Ատոմ Վերակացուի խաչքարի կրկնօրինակն է: 17 տարվա մեջ առաջին նվերն է, որ Խաղաղության պալատն ընդունում է: «Սա պատմություն է, որն այսօր մենք կերտում ենք ձեզ հետ միասին, քանի որ առաջին հայկական խաչն է տեղադրվում մի քաղաքում, որը հայտնի է որպես միջազգային իրավունքի և արդարության համաշխարհային մայրաքաղաք»,-ասաց Փաշինյանը:
Նա նշեց՝ հայ ժողովուրդը խաչքարեր է տեղադրում թե՛ Հայաստանում, թե՛ այն հյուրընկալ երկրներում, որտեղ տարբեր հանգամանքների բերումով հաստատվում է։ Այսպիսով, խաչքարը դառնում է բարեկամության, համերաշխության, համագործակցության և երախտագիտության խորհրդանիշ և պատգամ։ «Հազարամյակներ շարունակ Հայաստանը և հայերը ձգտել են խաղաղության՝ որպես իրենց հայրենիքում ապրելու և արարելու գերագույն նպատակ։ Մեր կառավարությունն այժմ անում է հնարավորը՝ տարածաշրջանում խաղաղության օրակարգը խթանելու համար՝ չնայած այն գոյութենական սպառնալիքներին, որոնց առերեսվում է իմ ազգը։ Այս խաչքարը խորհրդանշում է խաղաղության ու տոկունության հայկական ըմբռնումը և խաղաղության համար մշտական պայքարը՝ լինի դա հայկական լեռնաշխարհում և այլուր»,-ասաց Փաշինյանը:
Խաչքարն ընտրվել է որպես նվեր Խաղաղության պալատին՝ խորհրդանշելու աշխարհի խաղաղության հաստատմանը նպաստած հայերի սերունդներին։ «Այս նվիրատվությամբ Հայաստանը վերահաստատում է իր ամուր հանձնառությունը՝ շարունակելու իր ներդրումը խաղաղության գործում մեր տարածաշրջանում և ամբողջ աշխարհում»,-նշեց Փաշինյանը:
Հաագայի միջազգային իրավունքի ակադեմիայի խորհրդի նախագահ և Խաղաղության պալատի «Քարնեգի» հիմնադրամի նախագահ Փիթ Հայն Դոներն ասաց. «Մենք շատ շնորհակալ ենք այս հայկական խաչքարի համար: Խաղաղության պալատին նվերը պարզապես արվեստի հավաքածուի ներդրում չէ, դա նվիրում է, որը ենթադրում է հավատարմություն այն գաղափարին, որի համար կանգնած է խաղաղության պալատը՝ խաղաղություն, արդարություն և օրենքի գերակայություն»:
Այնուհետև Փաշինյանը շրջայց կատարեց Խաղաղության պալատում: