2 րոպեի ընթերցում
ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ: Հայտնի ռեփեր 50 Cent-ը ֆեյսբուքի պաշտոնական էջում անդրադարձել է հուլիսի 1-ին «Հրազդան» մարզադաշտում կայանալիք իր համերգին։ «Արմենպրես»-ի փոխանցմամբ՝ նա գրել է.
«Երևան,Հայաստան․․․ Հուլիսի 1-ին «Հրազդան» մարզադաշտում տեղի կունենա «ՀԱՅԱ» փառատոնը: Մենք լավ ժամանակ ենք անցկացնելու: Բաց մի թողեք: Ձեռք բերեք տոմսերը հիմա»,- գրել է ռեփերը:
«Հայա» երաժշտական փառատոնի շնորհիվ «Հրազդան» մարզադաշտում տեղի կունենա նաև սիրված երգչուհի Զազի մենահամերգը, երգչուհի, որին մեծանուն Շառլ Ազնավուրը ֆրանսիական երգարվեստի երկրորդ Պատրիսիա Կաաս է անվանել: Հուլիսի 9-ին «Հրազդան» մարզադաշտում ելույթ կունենա Led Zeppelin Symphonic-ը:
Փառատոնը կյանքի կկոչվի «Սոնատի» ընկերության ջանքերով: Ամիսներ առաջ ընկերության համահիմնադիր Սոնա Հովհաննիսյանը լրագրողների հետ հանդիպմանը շեշտել էր, որ աշխարհում նման փառատոններ շատ կան, սակայն մեր երկրում այն կազմակերպելու համար պետք են լուրջ կապեր, հեղինակություն:
«Բանակցություններ ենք վարում, որպեսզի 2023-ին հյուրընկալենք Սթիվի Ուանդերին, Սթինգին: Ուզում ենք Հայաստանը վերածել տարածաշրջանային մեծ «hub»-ի, որը զբոսաշրջության զարգացման նոր էջ կբացի ու կնպաստի տնտեսության զարգացմանը»,-եզրափակել էր Սոնա Հովհաննիսյանը: