1 րոպեի ընթերցում
ԵՐԵՎԱՆ, 2 ՄԱՐՏԻ, ԱՐՄԵՆՊՐԵՍ։ Հայաստանի Հանրապետության նախագահի թեկնածու Վահագն Խաչատուրյանը կարծում է, որ Հայաստանը պետք է ձգտի բարիդրացիական հարաբերություններ հաստատել իր հարևանների հետ: Նրա խոսքով՝ Հայաստանի զարգացումը պետք է տեսնել այդ տրամաբանության մեջ: Ինչպես տեղեկացնում է «Արմենպրես»-ը, Վահագն Խաչատրյանն այս մասին ասաց ԱԺ-ում իր թեկնածության հարցի քննարկմանը:
Նախագահի թեկնածուն ընդգծեց՝ պետք է կարողանանք խաղաղ ապրել հարևանների հետ:
«Խոսելը, բանակցելն ավելի ճիշտ ճանապարհ է, քան թե որևիցե մեկի հետ վիճելը, կռվելը կամ ուժ ցույց տալը: Ուժը կարող ենք ցույց տալ խելքով, գիտելիքով»,-նշեց Խաչատուրյանը:
ՀՀ նախագահի թեկնածուն հայտարարեց, թե իր համար ամբողջությամբ ընդունելի է ՀՀ կառավարության հայտարարած խաղաղ զարգացման դարաշրջան բացելու գաղափարն, ու նախագահը պետք է լծվի այդ գործին: