Եվրոպական խորհրդարանը ԵՄ-ին կոչ է արել ավելի ակտիվ մասնակցել ԼՂ հարցով կայուն կարգավորման որոնմանը
2 րոպեի ընթերցում
ԵՐԵՎԱՆ, 17 ՓԵՏՐՎԱՐԻ, ԱՐՄԵՆՊՐԵՍ: Եվրոպական խորհրդարանը ընդհանուր արտաքին և անվտանգային քաղաքականության իրականացման մասին 2021թ. տարեկան զեկույցում վերահաստատել է իր շարունակական աջակցությունը ԱլԳ երկրներին, մասնավորապես նրանց անկախությանը, ինքնիշխանությանն ու տարածքային ամբողջականությանը՝ իրենց միջազգայնորեն ճանաչված սահմաններում, ինչպես նաև ժողովրդի կամքը հարգելուն:
Եվրոպական խորհրդարանը զեկույցում կոչ է արել լիարժեքորեն կատարել Հայաստանի հետ համապարփակ և ընդլայնված գործընկերության համաձայնագիրը, ընդգծել է Հարավային Կովկասում ԵՄ-ի և անդամ պետությունների մասնակցության ընդլայնման անհրաժեշտությունը տարածաշրջանի կայունության և բարգավաճման, ինչպես նաև տարածաշրջանային տերությունների ազդեցությանը և միջամտությանը հակազդելու համար:
Եվրոպական խորհրդարանը նաև կոչ է արել ԵՄ-ին, նրա անդամ պետություններին և փոխախագահ/բարձր ներկայացուցչին ակտիվորեն մասնակցել Հայաստանի և Ադրբեջանի միջև Լեռնային Ղարաբաղի հարցով կայուն կարգավորման որոնմանը և կանխել տարածաշրջանում լարվածության հետագա էսկալացիան, մասնավորապես, Ադրբեջանի և Հայաստանի կողմից հետպատերազմյան խնդիրների լուծման, այդ թվում՝ սահմանների սահմանազատման և բոլոր ռազմագերիներին ազատ արձակելու ճանապարհով:
Նշվել է, որ ԵԱՀԿ Մինսկի խումբը մնում է այդ հակամարտության կարգավորման միջազգայնորեն ճանաչված միակ ձևաչափը՝ տարածքային ամբողջականության, ուժի չկիրառման, ինքնորոշման և իրավահավասարության, ինչպես նաև հակամարտությունների խաղաղ կարգավորման սկզբունքների հիման վրա:
Եվրոպական խորհրդարանը ԵԱՀԿ Մինսկի խմբին կոչ է արել շուտափույթ վերադառնալ իր միջնորդական դերին:
