Հայաստանը և Գերմանիան տոնում են դիվանագիտական հարաբերությունների հաստատման 30-ամյակը
3 րոպեի ընթերցում
ԵՐԵՎԱՆ, 31 ՀՈՒՆՎԱՐԻ, ԱՐՄԵՆՊՐԵՍ:Հայաստանի Հանրապետությունը և Գերմանիայի Դաշնային Հանրապետությունը տոնում են դիվանագիտական հարաբերությունների հաստատման 30-ամյակը: Ինչպես հաղորդում է «Արմենպրես»-ը՝ այդ մասին Թվիթերում տեղեկացրել է Հայաստանի Հանրապետության արտաքին գործերի նախարարությունը:
«30 տարի առաջ այս օրը Հայաստանը և Գերմանիան հաստատել են դիվանագիտական հարաբերություններ՝ շարունակաբար զարգացնելով և ընդլայնելով սերտ համագործակցությունը փոխադարձ հետաքրքրություն ներկայացնող ոլորտներում: Մենք միտված ենք հետագայում էլ խթանելու մեր բարեկամական հարաբերությունները, որոնք հիմնված են ընդհանուր արժեքների և պատմական կապերի վրա», - նշել է ՀՀ ԱԳՆ-ը:
«Հայաստանի Հանրապետության և Գերմանիայի Դաշնային Հանրապետության միջև դիվանագիտական հարաբերությունների հաստատման վերաբերյալ» հայտագրերի փոխանակումը Երևանի և Բեռլինի միջև տեղի է ունեցել սրանից ուղիղ 30 տարի առաջ՝ 1992 թ. հունվարի 31-ին:
Գերմանիան կարևոր գործընկեր է Հայաստանի համար թե՛ երկկողմ հարաբերությունների տիրույթում և թե՛ բազմակողմ համագործակցության ձևաչափերում՝ ՄԱԿ-ի, ԵԱՀԿ-ի, Եվրամիության տարբեր ծրագրերի և միջազգային այլ կառույցների շրջանակներում:
Հայ-գերմանական միջպետական հարաբերությունները հիմնված են իրավապայմանագրային լայն դաշտի վրա: Կողմերի միջև ստորագրվել է 43 համաձայնագիր և պայմանագիր, 5 արձանագրություն, 9 հուշագիր և ընդունվել է երկու համատեղ հայտարարություն:
Գերմանիան նաև Հայաստանի ամենախոշոր առևտրատնտեսական գործընկերներից է: Հայ-գերմանական առևտրաշրջանառության ծավալները վերջին տարիներին դինամիկ աճ են ցույց տալիս: ՀՀ ԱԳՆ-ի տվյալներով՝ 2020 թվականին Հայաստանի և Գերմանիայի միջև ապրանքաշրջանառության ծավալը կազմել է ավելի քան 526 մլն ԱՄՆ դոլար: Ընդ որում, նախորդ տարվա՝ 2019 թ. համեմատ (451,3 մլն դոլար) այդ ցուցանիշը աճել է մոտ 17 տոկոսով կամ 75,3 մլն դոլարով: Իր հերթին 2019 թվականին առևտրաշրջանառությունը 2018-ի համեմատ աճել էր 4,2 տոկոսով:
Երկկողմ քաղաքական հարաբերությունները նույնպես բարձր մակարդակի վրա են: ՀՀ վարչապետ Նիկոլ Փաշինյանը 2019 թ. հունվար-փետրվարին Գերմանիա է այցելել պաշտոնական, իսկ 2020 թ. փետրվարին՝ աշխատանքային այցերով:
Այս ոլորտում գերմանական կողմից ամենանշանավոր իրադարձությունը վերջին տարիների կտրվածքով, անշուշտ, Գերմանիայի Դաշնային Հանրապետության կանցլեր Անգելա Մերկելի պաշտոնական այցն էր Հայաստան 2018 թ. օգոստոսին:
Գերմանիայի դաշնային խորհրդարանը՝ Բունդեսթագը, Հայոց ցեղասպանության ճանաչման մասին բանաձև է ընդունել 2016 թ. հունիսի 2-ին:
Հայաստանում Գերմանիայի Դաշնային Հանրապետության արտակարգ և լիազոր դեսպանն է Վիկտոր Ռիխտերը, որն իր հավատարմագրերը ՀՀ նախագահին է հանձնել 2021 թ. նոյեմբերի 24-ին: 2021 թ. դեկտեմբերին դեսպան Վիկտոր Ենգիբարյանը ԳԴՀ-ում Հայաստանի Հանրապետության արտակարգ և լիազոր դեսպանի պաշտոնում փոխարինել է դեսպան Աշոտ Սմբատյանին: