ՀՀ և Չեխիայի ԱԳ նախարարները կարևորել են Ադրբեջանում պահվող հայ գերիների անհապաղ ազատ արձակումը
2 րոպեի ընթերցում
ԵՐԵՎԱՆ, 1 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի արտաքին գործերի նախարար Արարատ Միրզոյանը և Չեխիայի արտաքին գործերի նախարար Յակուբ Կուհանեկը հանդիպմանն ընդգծել են Ադրբեջանում պահվող հայ գերիների անհապաղ ազատ արձակման կարևորությունը:
«Արմենպրես»-ի հաղորդմամբ՝ Չեխիայի ԱԳ նախարարի հետ համատեղ հայտարարության ժամանակ ասաց ՀՀ արտաքին գործերի նախարար Արարատ Միրզոյանը:
«Մեր զրույցի ընթացքում կենտրոնացել ենք նաև ԼՂ հակամարտությանը, վերջինիս առնչվող հարցերի վրա: Հայաստանը բարձր է գնահատում հակամարտության կարգավորման հարցում Չեխիայի դիրքորոշումը, որը համահունչ է ԵՄ-ի դիրքորոշմանը. այն է՝ աջակցություն ԵԱՀԿ Մինսկի խմբի համանախագահության ձևաչափով խաղաղ բանակցությունների շարունակությանը և հակամարտության լուծման երկարատև, կայուն լուծման փնտրտուքին»,-ասաց Միրզոյանը:
Հայաստանի և Չեխիայի ԱԳ նախարարներն անդրադարձել են ԼՂ հակամարտությանն առնչվող և լուծման սպասող բազմաթիվ հումանիտար հարցերի,
«Մանրամասն խոսել ենք Ադրբեջանում պահվող հայ ռազմագերիների և պատանդառված քաղաքացիական անձանց խնդրի մասին, կարևորել նրանց անհապաղ ազատ արձակումը»,-ասաց ՀՀ ԱԳ նախարարը:
Չեխիայի նախարարի գլխավորած պատվիրակությունն այցել է նաև Ծիծեռնակաբերդի հուշահամալիր ու հարգանքի տուրք մատուցել Հայոց ցեղասպանության զոհերի հիշատակին:
«Այս առումով հայ ժողովուրդը բարձր է գնահատում Չեխիայի խորհրդարանի երկու պալատների կողմից Հայոց ցեղասպանությունը ճանաչող և դատապարտող բանաձևերի ընդունումը»,-ասաց նախարարը:
