2 րոպեի ընթերցում
ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: ՀՀ ոստիկանությունը խուզարկություն է իրականացրել «Հայաստան» դաշինքի Սյունիքի մարզի գրասենյակներից մեկում, այնտեղի ներկայացուցիչների բնակարաններում և ավտոմեքենաներում:
«Արմենպրես»-ի հետ զրույցում այս մասին հայտնեցին ՀՀ ոստիկանության հասարակայնության հետ կապի և լրատվության վարչությունից:
Դաշինքի կենտրոնական շտաբի պաշտոնական ներկայացուցիչ Արամ Վարդևանյանը «Ֆեյսբուք»-ում հայտնել էր, որ դաշինքի անդամներին Սյունիքի մարզից բերման են ենթարկում Երևան և խուզարկություններ իրականացնում մարզային գրասենյակներում:
«Քրեական ոստիկանության գլխավոր վարչությունում հարուցված քրեական գործի շրջանակներում՝ կեղծ քվեաթերթիկներ պատրաստելու և դրանք իրացնելու հատկանիշներով, ոստիկանները Սիսիան քաղաքի «Հայաստան» դաշինքի գրասենյակներից մեկում, ներկայացուցիչների բնակարաններում ու ավտոմեքենաներում իրականացրել են խուզարկություններ»,- նշեցին ոստիկանությունից և հավելեցին, որ այս պահի դրությամբ բերման ենթարկվածներ չկան:
Սոցիալական ցանցերում նաև տեսանյութ է հրապարկվել, որտեղ ոստիկանները մեքենա են նստեցնում «Հայաստան» դաշինքի Փարաքարի գրասենյակի ղեկավարին:
«Նրան բերման են ենթարկել տեղամասում բաց քվեարկություն կատարելու համար: Նա բերվել է ոստիկանության Վաղարշապատի բաժին»,- նշեցին ոստիկանությունից: