«Պոետի խոստովանությունը». «Արմմոնո» փառատոնին ներկայացվեց Սերգեյ Եսենինի մասին պատմող բեմադրությունը

ԵՐԵՎԱՆ, 7 ՀՈՒՆԻՍԻ, ԱՐՄԵՆՊՐԵՍ: Ռուս մեծ բանաստեղծ Սերգեյ Եսենինի մասին «Պոետի խոստովանությունը» ներկայացումը պատմում է գրողի՝ «Էնգլետեր» հյուրանոցում անցկացրած իր վերջին օրվա մասին, որտեղ պոետը միայնակ է իր մտքերի և հիշողությունների հետ:

«Արմենպրես»-ի հաղորդմամբ՝ «Արմմոնո» փառատոնի շրջանակում թատերասերները բեմադրությունը դիտելու հնարավորություն ունեցան հունիսի 6-ին Հայաստանի թատերական գործիչների միությունում:

Բեմադրիչ Սարգիս Շողունցը պատմում է, որ մոնոներկայացում բեմադրելու առաջարկն արել է դերասան Արման Մաթևոսյանը: «Համավարակի օրերին, երբ փակված էինք տանը, Արմանը հարցրեց, թե ինչով եմ զբաղված: Պատասխանեցի, որ ոչինչ չեմ անում: Նա առաջարկեց ներկայացում բեմադրել: Որոշեցինք այնպիսի բեմադրություն անել, որով հնարավոր լինի հյուրախաղերի մեկնել»,- նշում է Շողունցը:

Բեմադրիչն ու ռեժիսորը տարբեր հեղինակների, թեմաների մասին են մտածել, բայց որոշել են բեմից խոսել Եսենինի մասին:

Շողունցն ընդգծում է, որ Եսենինի բանաստեղծություններում հայրենասիրական շեշտադրումներն են շատ, ինչը կարևոր է, սակայն եթե ներկայացում բեմադրեր պատերազմից հետո, կանդրադառնար հայ հեղինակի: «Կարծում եմ՝ պատերազմից հետո բոլորս ինչ-որ չափով փոխվել ենք թե՛ բարոյապես, թե՛ գաղափարապես»,- նշում է բեմադրիչը:

Դերակատար Արման Մաթևոսյանի համար մոնոներկայացումը և՛ մենամարտ է, և՛ խոստովանություն: Դերասանն ասում է, որ բանակում ծառայելուց հետո, համավարակի օրերին և առհասարակ տարիների ընթացքում շատ բան է կուտակվել իր ներսում, ինչն անհրաժեշտ էր բարձրաձայնել, և դա արել են ներկայացման միջոցավ:

«Եսենինի գործերին ծանոթացել եմ վաղ հասակից: 14 տարկանից կարդացել եմ նրա բանաստեղծությունները, դիտել եմ նրա մասին պատմող գեղարվեստական ու վավերագրական ֆիլմեր, նրկայացումներ: Ինձ դուր է գալիս նրա կերպարը, նրա ընդգծված անհատականությունը, նրա խոսքերը, բողոքները, սերը: Եսենինի տեսակը ինձ շատ ոգևորում է և օրինակ ծառայում»,- խոստովանում է Մաթևոսյանը:

«Արմմոնո» 19-րդ միջազգային թատերական փառատոնը կանցկացվի մինչև հունիսի 15-ը Երևանում, Գյումրիում և Արտաշատում: «Արմմոնո»-ն տարեցտարի ընդլայնում է իր շրջանակները՝ ի հայտ բերելով նոր անուններ ու հնարավորություն տալով հայ հանդիսատեսին ծանոթանալու միջազգային թատերական իրողություններին:

Փառատոնը ուշադրությունը կբևեռի հայ հեղինակների գործերի վրա, աշխատանքներ կտանի Հայաստանի մարզային թատրոնների հետ՝ մոնոներկայացումների զարգացման ուղղությամբ, ինչպես նաև ինքնարտահայտվելու հարթակ կտրամադրի երիտասարդ դերասաններին ու բեմադրիչներին։

Անժելա Համբարձումյան