1 րոպեի ընթերցում
ԵՐԵՎԱՆ, 22 ԱՊՐԻԼԻ, ԱՐՄԵՆՊՐԵՍ: Անվտանգության խորհրդի քարտուղար Արմեն Գրիգորյանի խոսքով` տարածաշրջանում տրանսպորտային և տնտեսական կապերի ապաշրջափակման հարցում Հայաստանի համար ամենաառաջնայինն անվտանգության հարցն է: «Արմենպրես»-ի փոխանցմամբ` այս մասին Գրիգորյանն ասաց Ազգային ժողովում լրագրողների հետ զրույցում:
«Ապաշրջափակման հարցերը դեռ քննարկման փուլում են: Առարկայական բան այս պահին չկա, երբ առարկայական լինի, բնականաբար, այդ քննարկումների ընթացքում անվտանգության հարցերն առաջնային են լինելու: Մեզ համար ամենաառաջնային խնդիրն անվտանգությունն է և հետո մնացած հարցերը: Նույնիսկ, եթե տնտեսական հարցեր են քննարկվում, անվտանգության հարցերը միանշանակ օրակարգում են, և բոլոր հարցերին լուծում ենք տալու»,- ասաց Գրիգորյանը:
Հայաստանի, Ռուսաստանի և Ադրբեջանի միջև ստորագրված հայտարարությունում կետ է նշված նաև տարածաշրջանում տրանսպորտային և տնտեսական կապերի ապաշրջափակման մասին: