368.59
ՏԿԵ փոխնախարարն անդրադարձավ դիակիզարաններ ունենալու հարցին
1 րոպեի ընթերցում
ԵՐԵՎԱՆ, 16 ԱՊՐԻԼԻ, ԱՐՄԵՆՊՐԵՍ: Տարածքային կառավարման և ենթակառուցվածքների նախարարի տեղակալ Վաչե Տերտերյանը նշեց, որ գործող օրենքում կա դիակիզարան ստեղծելու կարգավորում, սակայն Հայաստանում դեռ չկան նման չափորոշիչներին համապատասխանող մասնավոր գերեզմանատներ:
«Արմենպրես»-ի փոխանցմամբ՝ այս մասին Տերտերյանն ասաց Ազգային ժողովում` պատասխանելով անկախ պատգամավոր Արման Բաբաջանյանի հարցին:
«Մենք հիմա էլ հուղարկավորությունների մասին օրենքով ունենք մասնավոր գերեզմանատների հնարավորություն, և դրանց չափորոշիչների մեջ, ի թիվս այլ պահանջների, կա դիակիզարան ունենալու պարտադիր պահանջ: Ցավոք, դեռ մենք մասնավոր գերեզմանատներ, ամեն դեպքում՝ այդպիսի չափորոշիչներին բավարարող գերեզմանատներ չունենք»,- ասաց Տերտերյանը:
Խորհրդարանում քննարկվում է «Հուղարկավորությունների կազմակերպման և գերեզմանատների ու դիակիզարանների շահագործման մասին» օրենքում փոփոխություններ և լրացումներ կատարելու մասին և Վարչական իրավախախտումների վերաբերյալ Հայաստանի Հանրապետության օրենսգրքում փոփոխություններ և լրացումներ կատարելու մասին օրենքների նախագծերի փաթեթը, որով առաջարկվում է սահմանել այն անձանց շրջանակը, որոնք իրավունք ունեն հուղարկավորվել ընտանեկան գերեզմանատանը:
Բաժանորդագրվեք մեր ալիքին Telegram-ում