3 րոպեի ընթերցում
ԵՐԵՎԱՆ, 1 ՄԱՐՏԻ, ԱՐՄԵՆՊՐԵՍ: Բաղրամյան պողոտայում մեկնարկել է ընդդիմադիր նախաձեռնության՝ «Հայրենիքի փրկության շարժման» հանրահավաքը ՀՀ վարչապետ Նիկոլ Փաշինյանի հրաժարականի պահանջով: «Արմենպրես»-ի հաղորդմամբ, շարժման ներկայացուցիչ Գեղամ Մանուկյանն իր ելույթում նշեց, որ այս օրերին բազմաթիվ ոլորտների ներկայացուցիչներ իրենց աջակցությունն են հայտնել «Հայրենիքի փրկության շարժման»-ը: Նա ընդգծեց, որ անհրաժեշտ է կանգնել բանակի կողքին:
«Մենք խորհրդանշական հատվածում ենք այժմ՝ Գիտությունների ազգային ակադեմիայի շենքի դիմաց: Ակադեմիան դեռ դեկտեմբերին էր պահանջում կառավարության ու վարչապետի հրաժարականը»,-ասաց Գեղամ Մանուկյանն՝ ընթերցելով ակադեմիայի հայտարարությունը: Ըստ հայտարարության՝ ակադեմիան, խորապես գիտակցելով պահի լրջությունը՝ իշխանություններից պահանջում է զերծ մնալ ժողովրդի ու զինվորականության վստահությունը վայելող փորձառու հրամանատարներին ասպարեզից հեռացնելու քայլերից։
Հայաստանի Հանրապետության զինված ուժերի գլխավոր շտաբը հայտարարություն էր տարածել՝ վճռական բողոք արտահայտելով Տիրան Խաչատրյանին գլխավոր շտաբի պետի առաջին տեղակալի պաշտոնից ազատելու առնչությամբ: Ստեղծված իրավիճակով պայմանավորված՝ ՀՀ զինված ուժերը պահանջել են ՀՀ վարչապետի և կառավարության հրաժարականը: «Ֆեյսբուք» սոցիալական ցանցով ուղիղ հեռարձակմամբ ՀՀ վարչապետ Նիկոլ Փաշինյանը հայտարարել էր, որ որոշել է պաշտոնից ազատել ՀՀ գլխավոր շտաբի պետ Օնիկ Գասպարյանին և պատրաստել է համապատասխան փաստաթղթերը: Հանրապետության Հրապարակում Նիկոլ Փաշինյանը հրավիրել էր հանրահավաք, որին հաջորդել էր երթ: Ազատության հրապարակում էլ անցկացվել էր ընդդիմության հանրահավաքը: Այնուհետև փետրվարի 25-ի լույս 26-ի գիշերվանից ընդդիմության ներկայացուցիչներն անցկացնում են Բաղրամյան պողոտայում՝ այնտեղ տեղակայելով վրաններ:
Այդ ընթացքում ՀՀ նախագահը որոշեց ՀՀ ԶՈւ Գլխավոր շտաբի պետին պաշտոնանկ անելու հրամանագրի նախագիծը առարկություններով ետ ուղարկել վարչապետի աշխատակազմ: Այդ առնչությամբ ՀՀ վարչապետ Նիկոլ Փաշինյանը հայտարարել էր, որ այդ որոշումը ամենեւին չի նպաստում ստեղծված իրավիճակի հանգուցալուծմանը: Վարչապետը նշել էր էր, որ ԳՇ պետին պաշտոնանկ անելու միջնորդությունը կրկին ուղարկում է նախագահին:
