«Հայրենիքի փրկության շարժումը» հերքում է իր կապը ԶՈՒ գլխավոր շտաբի հայտարարության հետ
3 րոպեի ընթերցում
ԵՐԵՎԱՆ, 26 ՓԵՏՐՎԱՐԻ, ԱՐՄԵՆՊՐԵՍ: Ազգային ժողովի շենքի դիմաց՝ Բաղրամյան պողոտայում, փետրվարի 26-ին ընթանում է «Հայրենիքի փրկության շարժման» հանրահավաքը: Ինչպես տեղեկացնում է «Արմենպրես»-ը, մինչ հանրահավաքի մեկնարկը «Հայրենիքի փրկության շարժման» մի քանի ներկայացուցիչներ լրագրողների հետ զրույցում խոսեցին Հայաստանում տեղի ունեցող իրադարձությունների մասին:
Անդրադառնալով Զինված ուժերի գլխավոր շտաբի հայտարարությանը` ՀՅԴ ԳՄ անդամԱրծվիկ Մինասյանը նշեց, այն որևէ մեկի հետ պայմանավորվածության արդյունք չէ, այլ հստակ պահանջ` ներկայիս քաղաքական իշխանության հրաժարականը:
«Փորձում են վերագրել, թե ,իբր, կա քաղաքական ուժերի հետ գաղտնի պայմանավորվածություն: Չկա նման բան: Բանակը երեկ կանգնեց ժողովրդի պահանջի կողքին և ինքն էլ պահանջեց կառավարության և վարչապետի հրաժարականը»,- ասաց Մինասյանը:
«Հայրենիքի փրկության շարժման» վարչապետի թեկնածու Վազգեն Մանուկյանը Զինված ուժերի գլխավոր շտաբի հայտարարությունը չի համարում ռազմական հեղաշրջման փորձ:
«Ինչ է նշանակում ռազմական հեղաշրջում` երբ զորքը մտնում է մայրաքաղաք կամ իշխանությունը վերցնում է կամ փոխանցում է ընդդիմությանը: Այդպիսի բան Հայաստանում տեղի չի ունեցել»,-ընդգծեց Մանուկյանը:
Խոսելով Ազգային ժողովում «Բարգավաճ Հայաստան» և «Լուսավոր Հայաստան» կուսակցությունների կողմից նախաձեռնած արտահերթ նիստը չկայանալու մասին` Մանուկյանն ասաց, որ միայն ժողովրդի մեծ ճնշման դեպքում «Իմ քայլը» խմբակցությունը ստիպված կլինի ընդառաջ գնալ:
«Հայրենիքի փրկության շարժման» վարչապետի թեկնածուն նաև մեկնաբանեց Ադրբեջանի նախագահ Իլհամ Ալիևի այն հայտարարությունը, որտեղ նա նշել էր, թե Ադրբեջանը Հայաստանին հանձնել է բոլոր գերիներին: Մանուկյանն ասաց, որ Ալիևն այդ հարցը օգտագործում է իր քաղաքական նպատակների համար:
«Հայրենիք» կուսակցության նախագահ Արթուր Վանեցյանը նույնպես կարծում է, որ Զինված ուժերի գլխավոր շտաբի հայտարարությունը որևէ կերպ պետք չէ ընկալել որպես աջակցություն Հայրենիքի փրկության շարժմանը կամ որևէ այլ քաղաքական ուժի: «Նրանք խոսել են այն մասին, որ Նիկոլ Փաշինյանը այլևս ի վիճակի չէ ապահովել մեր երկրի անվտանգությունը»,- ասաց Վանեցյանը: