3 րոպեի ընթերցում
ԵՐԵՎԱՆ, 25 ՓԵՏՐՎԱՐԻ, ԱՐՄԵՆՊՐԵՍ: Կ. Ս. Ստանիսլավսկու անվան ռուսական դրամատիկական թատրոնում աշխատանքների ակտիվ փուլ է: Թատրոնում ոչ միայն վերականգնել են նախորդ տարի ունեցած ներկայացումները, այլև պատրաստվում են պրեմիերաների:
«Արմենպրես»-ի մամուլի սրահում հրավիրված ասուլիսում Կ. Ս. Ստանիսլավսկու անվան ռուսական դրամատիկական թատրոնի տնօրեն Մարիաննա Մխիթարյանը նշեց, որ առաջին պրեմիերան նախատեսված է մարտի 20-ին և 21-ին:
«Մենք արդեն նախապատրաստվում ենք: Երիտասարդ բեմադրիչ Նորա Գրիգորյանը բեմադրում է ներկայացում, որը կկոչվի «Չսեր»: Ես կարծում եմ, որ մեր հանդիսատեսին դա շատ կգրավի, մանավանդ երիտասարդներին: Թատրոնի գեղարվեստական ղեկավար Կարեն Ներսիսյանի բեմադրությամբ հանդիսատեսի դատին կներկայացվի դասական գործ՝ Մոլիերի «Սկապենի արարքները»: Այստեղ ներգրավված է թատրոնի երիտասարդական կազմը»,-ասաց Մարիաննա Մխիթարյանը: Թատրոնի գեղարվեստական ղեկավարը կբեմադրի ևս մեկ ներկայացում, որը կոչվում է «Ծիծաղի ակադեմիա»: Հունիս ամսին էլ Ի. Հարությունյանի բեմադրությամբ բեմում կլինի տարիներ առաջ թատրոնում հաջողություն ունեցած «Ինչ տեսավ սպասավորը» ներկայացման նոր տարբերակը:
Մարիաննա Մխիթարյանը նկատեց, որ հանդիսատեսից արձագանքը չի ուշացել, դահլիճները լեփ-լեցուն են:
«Ժողովուրդը կարիք ունի մշակութային նոր վերելքների: Այո, թատրոնը ինչ-որ տեղ նաև թերապիա է, որը հիմա անհրաժեշտ է մեր ժողովրդին: Տեսնելով լեփ-լեցուն դահլիճները, արձագանքը՝ հասկանում եմ, որ ներկայացումներ բեմադրելու անհրաժեշտություն կա»,-ասաց Մարիաննա Մխիթարյանը:
Թատրոնի պայմանները բարելավելու ուղղությամբ զգալի աշխատանքներ են արվել և դեռ շարունակվելու են: Տեղադրվել է ջեռուցման, օդափոխության և հովացման նոր համակարգ: Վերազինվել է ձայնային տեխնիկան: Թատրոնի շենքի ճակատային մասում կտեղադրվի թատրոնի անվանումը` գլխատառերով, ինչը յուրահատուկ տեսք կտա շքամուտքին: Ինչպես Մարիաննա Մխիթարյանն է նշում՝ հանդիսատեսն իրեն հարմարավետ է զգում: Հարստանում և վերազինվում է նաև թատրոնի գրադարանը: Շուտով այն կհամալրվի ՀՀ ժողովրդական արտիստ Երվանդ Ղազանչյանի հարուստ ու բազմահատոր գրքերի հավաքածուով: