Զինծառայողների հիմնադրամը նվիրաբերությունների 80 տոկոսը ստացել է արցախյան վերջին պատերազմից հետո
3 րոպեի ընթերցում
ԵՐԵՎԱՆ, 23 ՓԵՏՐՎԱՐԻ, ԱՐՄԵՆՊՐԵՍ: «Զինծառայողների ապահովագրության հիմնադրամն» իր ստեղծման օրվանից մինչ այս պահը հիմնական ծրագրով սպասարկում է 1 528 ընտանիքի, որոնցից 1 111-ը՝ վերջին պատերազմից հետո:
«Արմենպրես»-ի մամուլի սրահում հրավիրված ասուլիսում այս մասին նշեց «Զինծառայողների ապահովագրության հիմնադրամի» տնօրեն Վարուժան Ավետիքյանը: Նա տեղեկացրեց, որ հիմնադրամի ընդհանուր շահառուներին հատուցվել է 14 մլրդ դրամ, որից 12 միլիարդը անցյալ տարվա պատերազմից հետո: Ֆինանսական հատուցումը կատարվում է ինչպես միանվագ, այնպես էլ երկարաժամկետ կտրվածքով:
«Հիմնադրամն իրականացնում է ծրագիր, որի շրջանակում միանվագ և երկարաժամկետ հատուցում է տրամադրվում զոհված, առաջին և երկրորդ կարգի հաշմանդամություն ստացած, ինչպես նաև անհայտ կորած զինծառայողների ընտանիքներին: Դրանից բացի, վերջին պատերազմի արդյունքներով ունեցանք երկու նոր ծրագիր, որոնք անվանում ենք «Կամուրջ»՝ ուղղված ծանր վիրավորում ստացած զինծառայողներին, ինչպես նաև անհայտ կորած զինծառայողների ընտանիքներին: Հաշվի առնելով, որ ծանր վիրավորում ստացած զինծառայողները միայն որոշ ժամանակ անց են հաշմանդամության կարգ ստանում, քանզի մինչ այդ նրանք պետք է բուժվեն, ապաքինվեն, անցնեն փորձաքննություն և նոր միայն այդ կարգը ստանան, հետևաբար այս նոր՝ «Կամուրջ» ծրագրով նրանք կարող են դիմել ֆինանսավորում ստանալու»,- ասաց Վարուժան Ավետիքյանը:
Մյուս «Կամուրջ» ծրագիրն անհայտ կորած զինծառայողներին է վերաբերում: Վարուժան Ավետիքյանը նշեց, որ «անհայտ կորածն» իրավական կարգավիճակ է, որը տրվում է միայն դատարանով: Քանի որ դատարան դիմելը, դատարանի որոշում ստանալը ենթադրում է որոշակի ժամանակահատված, որոշում է կայացվել աջակցություն տրամադրել «Կամուրջ» ծրագրով: Ֆինանսական հատուցումը 6 ամսով է, մինչև հարցերը հստակեցվելը:
«Կամուրջ» ֆինանսավորմամբ հատուցում է տրամադրվել 803 անհայտ կորած զինծառայողներին ընտանիքների: Հատուցումը տրամադրվում է 6 ամսով, ամսական 300 հազար դրամի չափով: Այս ուղղությամբ ընդհանուր 365 մլն դրամի փոխհատուցում է տրվել: Ինչ վերաբերում է ծանր վիրավորում ստացածներին, ապա ներկայում 55 նման զինծառայող է հատուցում ստացել: Ընդհանուր գումարը կազմում է 17 մլն դրամ: Վարուժան Ավետիքյանը նշեց, որ ՀՀ կառավարության որոշմամբ ծանր վիրավորում կամ խեղում ստացած զինծառայողներին կավելանան նաև նրանք, որոնք ստացել են 1-ին կամ 2-րդ կարգի քաղաքացիական հաշմանդամություն, բայց դեռ չեն ստացել զինհաշմանդամություն:
Հիմնադրամը իր ստեղծման օրվանից մինչ այսօր ստացել է շուրջ 32 մլրդ դրամ պարտադիր վճարների գծով գումար: Շուրջ 9 մլրդ դրամի չափով էլ նվիրաբերություն է ստացվել աշխարհի ավելի քան 60 երկրից: Վերջին պատերազմից հետո հիմնադրամը ստացել է շուրջ 7.5 մլրդ դրամի նվիրաբերություն: Նվիրաբերությունների շուրջ 80 տոկոսը ստացվել է վերջին պատերազմից հետո: