«Սիթի օֆ սմայլ» բարեգործական հիմնադրամը 3 տարում հոգացել է շուրջ 400 երեխայի բուժման ծախսերը
1 րոպեի ընթերցում
ԵՐԵՎԱՆ, 15 ՓԵՏՐՎԱՐԻ, ԱՐՄԵՆՊՐԵՍ: Հայաստանում քաղցկեղ և արյան հիվանդություններ ունեցող երեխաների և մինչև 25 տարեկան երիտասարդի բուժման իրականացմանը մեծ աջակցություն է ցուցաբերում նաև «Սիթի օֆ սմայլ» բարեգործական հիմնադրամը:
«Արմենպրես»-ի հաղորդմամբ՝ այս մասին մամուլի ասուլիսի ժամանակ ասաց Հայաստանի մանկական քաղցկեղի և արյան հիվանդությունների կենտրոնի ղեկավար Գևորգ Թամամյանը:
«Հիմնադրամի աջակցությամբ ստեղծվել են աշխատանքային խմբեր տարբեր ուղղություններով՝ լեյկեմիա-լիմֆոմաներ, ոսրկամկանային, սոլիդ ուռուցքներ, նեյրոուռուցքաբանություն և այլն: Աշխատանքային խմբերի դերը նրանում էր, որ մենք կարողացանք 20 հիվանդության գծով բժշկական ուղեցույցներ մշակել»,- նշեց Թամամյանը:
Նրա խոսքով՝ գործունեության շուրջ 3 տարվա ընթացքում հիմնադրամը հոգացել է շուրջ 400 երեխայի և երիտասարդի բուժման ծախսերը: Տրամադրվել է մոտ 700 միլիոն դրամի աջակցություն: