2 րոպեի ընթերցում
ԵՐԵՎԱՆ, 26 ՀՈՒՆՎԱՐԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանն անընդունելի է համարում դատական համակարգի քաղաքականացման փորձերը:
«Արմենպրես»-ի փոխանցմամբ` այս մասին վարչապետն ասել է Արդարադատության նախարարությունում հրավիրված խորհրդակցության ժամանակ:
«Արդարադատության նախարարությունն, իհարկե, գործունեության շատ լայն շրջանակ ունի, բայց, սովորաբար, առաջին հերթին ասոցացվում է դատական, դատաիրավական համակարգի քաղաքականության և օրենսդրության հետ, և ես ուրախ եմ, որ մենք, ըստ էության, դատական համակարգի բարեփոխումներին վերջին շրջանում շատ մեծ թափ ենք հաղորդել: Իհարկե, այդ գործողությունների և բարեփոխումների արդյունքները միանգամից չէ, որ տեսանելի են դառնում և տեսանելի կդառնան, բայց ես համոզված եմ, որ մենք հետևողական քայլերի շնորհիվ կկարողանանք հասնել այն նպատակի իրագործմանը, որն ունենք մեր առաջ, այն է` անկախ դատական համակարգի և արդար դատական համակարգի հաստատումը»,- ասել է Փաշինյանը՝ նշելով, որ վերջին շրջանում ականատես ենք եղել դատական համակարգի քաղաքականացման փորձերի, ինչն անթույլատրելի է և խարխլում է դատական համակարգի և արդարադատության գաղափարը:
Վարչապետն ընդգծել է, որ այստեղ պետք է ոչ միայն ընթացիկ, այլև երկարաժամկետ մեխանիզմներ լինեն նման երևույթները ոչ միայն արմատախիլ անելու, այլև ընդհանրապես թույլ չտալու համար:
Նիկոլ Փաշինյանն ու նախարարության աշխատակազմը քննարկել են նաև նախարարությանն առնչվող այլ հարցեր:
